📖 ZKIZ Archives

赤柱興建停車場 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130812/18374163

一位美國朋友幾年前賣掉山頂住宅單位，到赤柱買咗一間屋，還有餘錢為一仔一女分別在中半山分別買入住宅單位，解決了一家四口之獨立居住問題，梗係開心啦。不過最近佢與赤柱一班外籍居民就好唔開心喎，因為早上到中環返工，塞車塞到失魂，香港仔隧道就如二十幾年前嘅獅子山隧道，早上行不得也哥哥，到咗星期六日，平時幾清靜嘅赤柱就有大量「香港人遊客」入侵，大把車輛殺到，把赤柱塞到水洩不通，出入困難，加上赤柱停車場少，只有一個「史丹利廣場」停車場，啲車無處可擺，唔知點算。
最近呢位美國朋友Ｓ得悉政府可能重提舊事，要在赤柱灘道（近沙灘）興建一個多層停車場，有150個車位，朋友Ｓ當堂彈起，認為由星期一至五，赤柱根本唔需要停車場，一年之中，停車場只會有百零日有用，根本係浪費公帑，兼且在狹窄道路起停車場，會令赤柱灘道，赤柱村道擠塞到不得了，赤柱居民更加不便。於是朋友Ｓ想話發動抗議，但本地人區議員反應冷淡，商戶需要遊客生意，亦唔理睬，朋友Ｓ問左丁山點辦，左丁山笑曰：「咪好似其他地區居民咁樣，由你組織所有赤柱洋人居民在星期六日，穿泳褲、比堅尼上街示威，阻塞赤柱灘道，高叫示威抗議囉，如果赤柱全部洋人西婦都揸住英文示威牌上街，事先通知CNN、BBC，可能會成為世界趣聞㖭，令運房局局長張炳良受嚇國際壓力都好呀！」
朋友Ｓ話：「得唔得㗎，我地猛咁寫信俾立法會議員及區議員咯喎？」今時今日，寫雞腸信俾議員有鬼用咩，田北辰都話過，邊位絕食邊位就惡啲吖嗎，朋友Ｓ大可搵兩位肥胖洋人在赤柱灘道靜坐絕食抗議，無論成功與否都可達到若干瘦身效果！
記者小Ｇ亦住在赤柱，不過係住在無敵海景居屋，佢話每逢陽光普照嘅週末，佢就皺眉頭，因為外來遊客擠滿赤柱大小餐廳，令佢與老公無處落腳，產生有反對「香港人到赤柱自由行」嘅衝動！冇法啦，香港比較好嘅沙灘全部位於港島南區，偏偏南區沙灘地段道路最為狹窄，難有地鐵通車，冇得搞！

PermaLink: https://articles.zkiz.com/?id=73696
Next Page
ZKIZ Archives @ 2019