ZKIZ Archives


「無牌」老闆施永青

2013-07-11  NM
 
 

 

上週日,兩萬幾個地產代理,歷史性上街遊行反3D辣招,中原老闆施永青事前猛叫人去,自然都行埋一份。邊行,佢邊掏出新咭片;一睇,咦!咩牌都無嘅!現時地產代理有兩個牌照可攞,分別係E(可經營業務牌照)及S(營業員牌照),老施而家兩個牌都無!佢解釋話:「以前有牌,但而家退咗休咁多年,唔理業務啦,已經無續牌,地監局網頁都搵唔到我資料。」相當貫徹佢嘅「無為而治」。

老施仲話,當年唔注重考試,但係佢喺九九年首批考牌者中,都攞到「distinction」,仲獲政府頒發獎牌,不知幾開心。但佢唔係「天字第一號」噃!根據政府制度,六位數字嘅牌照號碼,係由電腦抽籤,唔會論資排輩,而且跟足一世,即使agent被釘牌或無續牌,事後再申請,都係用番同一個冧巴。唔知邊個agent,咁好彩抽中牌照NO.000001呢?

地產界逃亡潮

早輪發展商新鴻基地產(16),因家變內耗,人才大量流失,據聞有成百幾二百名中高層職員離開。呢班「避難」嘅員工,絕大部分走咗去「對家」新世界發展(17),投靠新上位嘅集團接班人鄭志剛。不過咁,佢哋去到先發現,呢位太子爺樣樣都有興趣做,最弊係,幻想過多。於是,又走!部分人轉去跟恒隆(10)陳啟宗,又咁噃,繼老臣子吳士元後,過去幾個月離開恒隆嘅有:兩位做咗幾十年嘅執董姚子賢及高伯遒、入咗去只一年多嘅前八達通CEO陳碧鏵及項目發展高級經理司徒永康,而另一老臣子張錦齡,亦傳聞意興闌珊。Ronnie一向亦出名「惡啃」,小宗只有講句:適者生存。

本週街招part 2

上期本刊搜羅咗兩張街招,係股壇嘅詹培忠父子同張志誠父子,被周街貼「嘜頭」追數。今個禮拜,又輪到呢一位。喺銅鑼灣街頭,近日周圍貼咗港姐陳法蓉前男友朱明嘅「大字報」,貼到連地下都有!佢被指欠債不還。有「油王」稱號嘅朱明,據講○三年才由內地來港,從事糧油及電廠生意,是中協集團老闆。不過佢最響朵,係同陳法蓉嘅一段情,後來忽然失蹤,令對方飽受創傷;咁講到追錢債、情債、心債,女方最有資格啩!

Give me a break 古董錶見證起落

中環熟男愛靚錶,不過唔一定要追新款,充滿歷史味的古董錶更加見得人。天后「精確鐘錶」,有三十二年歷史,屬「老字號」之一。老闆Raymond話,玩古董錶豐儉由人,幾百蚊至幾十萬都有交易,視乎手錶的品牌、設計及保養程度而定。名廠Rolex起價一萬,五十年代的產量多,所以貨源充足,是為熱門之選;Omega五千至一萬元的中價款式亦好受歡迎。有熟客仔話,間鋪啲古董錶就咁放晒喺木兜,可以攞上手逐隻試,夠晒尋寶feel。Raymond平日沖定壺靚茶,歡迎客人來打牙骹。古董錶仲見證香港的經濟興衰,八、九十年代,香港人富裕起來,有富豪第二代揸住架勞斯萊斯買錶;「外國賓架來開會,都會攝時間嚟排隊睇錶,鋪頭門外係一條Benz車龍。」Raymond說,當年他周不時都飛去歐美市場入貨。當九八年樓價大跌,「啲客就用惠康膠袋,袋住十幾隻古董錶,劈價放售。」呢幾年已經無呢支歌仔唱,皆因古董錶已變得矜貴,化身「投資項目」,醒目的買家都拎咗去拍賣行了。

金牙大狀講嘢

有人冇——料——到經民聯成員、新界王發叔劉皇發揚言造反有理,為咗反對擴建屯門堆填區,即使拉布亦在所不惜云云。到咗呢個地步,保皇「建制派」可謂潰不成軍矣。咁搞落去,想唔施政癱瘓都難也。由港英時代開始,發叔已經係建制中人。過渡之後,繼續幫特區政府喺新界排難解憂;高鐵固然搞掂,菜園村一樣擺平。煲呔感激其汗馬功勞,更加請咗佢入行政會議以為酬庸。好似佢咁嘅老字號保皇派,今日都反梁振英枱,689係咪好應該深切反省呢?於此可見,若然施政果真癱瘓,咁係唔賴得晒長毛呢一班偏激分子者;更深層次嘅矛盾,係咪好似田少話齋,有人冇——料——到呢?


PermaLink: https://articles.zkiz.com/?id=64968

Next Page

ZKIZ Archives @ 2019