| ||||||
為咗抗衡七一回歸大遊行，政府真係花心神，搞咗個啟德巨蛋「維穩騷」。但原來show前一日，有謝霆鋒同阿里巴巴創辦人馬雲講創業嘅「鋒雲際會」，都係「維穩騷」系列之一，當日仲吸引咗七千人湧去朝聖。 呢個由霍啟剛做活動召集人嘅《家是香港‧伴你啟航》青年創業論壇，邊有力請得郁咁重量級嘅嘉賓呀，背後梗有阿爺「十卜」啦。當日真係政商界猛人雲集，忙到甩轆嘅政務司司長林鄭月娥都蒲頭，同場仲有中聯辦副主任王志民、民政事務局局長曾德成，同一大抽全國政協委員，企到成個台滿晒，「紅光四射」。商界方面，摩根大通證券亞洲區副主席方方都有上台分享。（有運行矣！）台上馬雲同謝霆鋒落力演出，一個耍太極、一個煮嘢食，又講吓「認真工作便輸了」的馬雲式理論，啱晒場內年輕人口胃。唉，政府搵晒猛人出來，無非驚七一遊行太多人，又怕如箭在弦嘅佔領中環會癱瘓香港。之不過，小宗騷後離開時，喺巴士聽到個好清醒嘅市民話：「今日聽完馬雲，聽日（七月一日）再去遊行！」所以話，你估眉精眼企嘅香港人，是傻的嗎？ 李根興「爛gag」抽水 除咗馬雲、謝霆鋒同方方，大會仲請咗盛匯商機創辦人李根興做演講嘉賓。同台嘉賓太猛料，講者都要出盡法寶，免得成為「廁所位」。嗱！李根興就醒目呢，因為佢識搵當日最紅嘅馬雲做話題。話說馬雲當日雖然一落機就趕去現場，但都遲咗成個鐘先出現，李根興就喺台上話：「頭先馬雲係搭巴士過嚟，佢喺途中，遇到一個朋友揸林寶堅尼，朋友話為咗唔遲到，所以要開最快嘅跑車！馬雲聽完，就施施然咁講：『如果你真係咁重要，所有人都會等埋你！』」李根興再補充：「為咗見馬雲，我哋由三點等到七點都肯﹗」究竟想暗寸定抽水？佢自己至知啦！ Give me a break踩單車穿梭中環 中環人多車多斜路多，點睇都唔係一個踩單車嘅好地方。但近年金融區喺上班日，不時見到單車喺大街小巷穿梭，不少金融佬受外國行家啟發，提倡踩單車返工，既環保又可以做運動。小宗朋友、中環老金煎餅嘅老闆Brian就係其中一個。Brian係美國人，以前喺灣仔嘅法興證券（香港）返工，當時佢已經喺中環開咗老金煎餅，每日都踩單車穿梭中環灣仔睇鋪。識講普通話、熱愛中國文化嘅Brian興奮道：「我鍾意踩單車，好有Beijing style，中環去灣仔只係七分鐘，唔使錢又方便。」他指踩單車和其他車輛一樣，要遵守交通規則。「喺灣仔，我鍾意踩電車路，無其他車行，好平靜。不過踩電車路要用厚呔，如果唔係條呔好易攝入路軌，好危險。」喺市區踩單車危險性較高，Sky Blue Bikes嘅職員Hugo就推介單車友揀公路車（Road Bike）：「中、上環斜路多，呢款車車身較輕，較適合石屎地。」另外，法例規定單車友要戴頭盔，Hugo強調：「單車仲要裝前後燈，前白後紅。喺馬路上，最緊要留意其他車輛，有啲司機會覺得單車慢而唔理單車友嘅安全o架。」 本週街招 近日股市反反覆覆，唔少股票跌到一仆一碌，正所謂「寃有頭債有主」，由是以往經典嘅追債街招又再出現。上月初，詹培忠同阿仔詹劍崙（上），喺中環被貼街招追數；到近日，就到大凌集團（211）嘅張志誠同張浩宏父子（下），俾人喺炮台山「貼堂」。素有「大凌張」之稱嘅張志誠，十幾廿年前喺股壇甚有江湖地位，但因為虧空公司資產，搞到大凌自○四年起被停牌長達八年，坐艇小股東成日跑去港交所示威。直至上年，過完八年抗戰嘅大凌先「奇跡」復牌。睇呢兩張街招，無論擺位、構圖、字樣都好鬼似；咁今次究竟係父債子還，子債父還，定父子債、父子還呢又？ 金牙大狀講嘢取消雙辣招 官家為咗增加供應，延長樓花售賣期至三十個月，期限加幅達五成。配合埋買家印花稅等辣招，樓市不難從此進入所謂「下行」階段也。從世界宏觀大局睇，美國聯儲局已有言在先將在下半年開始退市，到出年更逐步結束「量化寬鬆」。果如此，利率會點走法，仲使問阿桂乎？利率上升，樓價會起定跌，當然亦唔使多講矣。發展商莫不挑通眼眉，見到咁嘅形勢，你估佢哋會加快抑或減慢出貨進程吖？現今官府更又延長樓花售賣期以為配合，咁樓市又有乜辦法唔開始「下行」先？怕且怕，呢個增加供應嘅辦法有效過頭，以致個市「下行」過頭，則手尾長矣。取消雙辣招等特殊行政措施，此其時也？ | ||||||