皇后大道中、砵甸乍街交界嘅泛海大廈地下，以前係「中藝」，去年已經遷出，最近有新店開張，叫做Topshop，猛烈太陽之下，居然有大把女士在門口排隊，似紅隧獅隧在繁忙時間咁樣，潮水式入內，乜咁有吸引力呀？問秘書V：「這是甚麼名店？」佢話：「英國名店囉，我都想排隊入去睇吓，不過驚住排到兩點都入唔到去，下晝返工遲到會俾老闆鬧。」
香港女士生意睇落幾易做，Topshop斜對面嘅H&M久唔久就有甚麼crossover時裝出售，例必有人在門口排隊，畢打街嗰間A&F開幕時，啲上身裸體健男吸引到無數女士入內（現在已經靜晒）。話時話，有咗呢類外國「名店」，本地薑如Esprit之類就顯得幾冷清，思捷環球（330）嘅股價跌得咁勁，平時行街都可以睇到理由。
如果間間名店嘅門口都聚集人群，舖租肯定會猛升啦，不過唔係呢。在Topshop門口撞到鐘錶A，原來佢亦係走嚟睇熱鬧，問佢一聲：「唔駛睇舖咩？」鐘錶A話：「夥計可以搞掂啦，習近平上台後，內地豪客漸少，最近一個月，我地只係賣到幾隻勞力士，反而奧米加就多咗，你都明白係乜嘢一回事啦，既然冇乜大客，我唔駛贒到實，咪走出嚟望吓，Topshop究竟吸引到邊一種客人。」算啦，自2004年初計，至今近十年，係鐘錶A嘅黃金十年，早已賺得盤滿缽滿，依家生意淡啲，反而有時間享受清閒生活。鐘錶A話：「二十年前我係開舖頭搵兩餐啫，估唔到2003年沙士大禍之後，我呢行會發得咁緊要。全世界最貴嘅鑽石錶，售價七千萬元，竟可以在抵港後一星期就賣出，令香港威盡全球鐘錶界，令瑞士高度重視香港，雖然我冇資格賣呢隻錶，係行家太子珠寶鐘錶賣嘅，身為行家，我亦與有榮焉！」買家當然係內地豪客啦，不過根據最近內地一個調查《中國奢華旅遊白皮書》，內地富豪最喜歡嘅外遊國家城市，前十名冇香港份，前五名係法國、美國、新加坡、瑞士、英國，香港高檔零售是否可以繼續維持競爭力，冇把握㗎。 