📖 ZKIZ Archives

輸在起跑線 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130414/18227085

小Y Y、小欣欣、小海倫、小海倫妹妹等等幾位三十歲上下嘅年青太太，差不多時間（相差一年左右），各自產出嬰兒，全部係女，加上左丁山嘅朋友賓架Ｃ，股票Ｋ，老闆Ｌ等人去年抱孫，又係孫女，唔通香港風水重女不重男，又有咁蹺嘅？七位活潑小B B食嘅奶粉，冇一隻係美X X，美Y Y Y嘅，藥房有大把供應，所謂奶粉荒，其實係人嚇人，可憐係特區政府啲高官竟然被嚇到腳軟，推出限奶令，真係冇用之至。
於是一個「新興討論題目」就係如何為B B搵幼稚園，左丁山起初聽佢地講幼稚園，覺得多餘，駛乜咁快呀，點知俾啲年青媽咪批評一餐：「Uncle，你out晒咯，依家要為B B諗定portfolio㗎，否則入唔到好學校！」投資組合（investment portfolio）就講得多啫，一兩歲小孩能有甚麼portfolio？佢地話係各類活動啦，playgroup啦，啦啦啦，左丁山聽到不耐煩，總覺得香港幼稚園教育如果搞成咁，唔讀好過讀！
但保險Ｃ（僱員退休福利策劃總監）話俾左丁山聽，佢一個高級手下生咗個女，剛過百日宴，已經籌辦買教育基金計劃，估計由幼兒園，幼稚園，小學，中學，英國寄宿學校，最後入讀牛劍或哈耶畢業嘅話，全部讀私立/國際/直資/寄宿名校，總費用約一千萬元，依家就要開始度掂筆數。左丁山話：「發咗癲咩，培育一位千金要一千萬？自小攞學券津貼讀幼稚園，然後讀十二年免費本地津中或官中，教育經費由納稅人埋單唔好咩？」保險Ｃ話：「你唔怕仔女孫兒輸在起跑線上咪得囉！」哦！呢句係真話，廿一世紀爸媽好怕子女輸在起跑線，故此咁自尋財政煩惱。左丁山細個時，都唔知起跑線喺邊度，出閘落後幾十個馬位（遲入學，冇讀幼稚園，小學留級，英文交白卷），好彩人生係長途賽，跑吓跑吓，自己自問追過好多人，能在中環行走，穿梭自如，現在仍然不相信輸在起跑線呢個Myth（迷思），只相信新一代嬰兒，能學懂「學而時習之，不亦樂乎」，只要佢地肯自動讀書，維持一個開放心靈，識得終身學習嘅話，就點都唔會跑輸在起跑線！


左丁山
PermaLink: https://articles.zkiz.com/?id=54728
Next Page
ZKIZ Archives @ 2019