萬南 二五中環 分家之後 福臨門愈做愈好
1 :
GS(14)@2015-03-23 16:24:26http://www.metrohk.com.hk/index.php?cmd=detail&id=271625&search=1
香港人鍾意跟著名食評去搵食，米芝蓮以個別地區為單位，而另一認受性高嘅食壇頒獎禮「亞洲50最佳餐廳」，上星期公布今年最新結果，香港總共有9間食肆入圍，排名分先後次序，最叻係食法國菜嘅Amber(第6名)，而岳少投資嘅8 1/2 Otto E Mezzzo Bombana緊接其後排第8，至於中菜則以富豪飯堂福臨門獲最高名次，排第15位。
萬南上星期到福臨門食飯，遇到太子女Janet徐淑華，佢話當日陪同行政總廚劉照成(圖右)及主廚梁燊龍(圖左)飛到新加坡領獎。原來頒獎過程都幾刺激，每間餐廳當初只知有份入圍，唔知第幾位，司儀由尾開始逐一揭曉，感覺相當刺激。
翻查資料，福臨門由2013年開始打入「亞洲50最佳餐廳」，呢年剛好係老闆兄弟經歷多年爭執後，決定正式分家，結果五哥徐沛鈞全盤掌管福記後愈做愈好，由最初入榜排名48，舊年大躍進排19，今年又再爬升幾級。Janet話做到咁好成績，全靠整個團隊，所以領獎亦由兩位大廚做代表，自己唔搶風頭，負責揸機影相。
Janet仲話只會開心一陣，嚟緊仲有大堆工作殺到，包括今年中到澳門開分店，佢期望將來可以打入「亞洲50最佳餐廳」，好似Robuchon咁各地分店亦可榜上有名。至於香港總店就希望更上一層樓，成為史上首間中菜館入選「全球50最佳餐廳」，令更多人認識粵菜精髓。