ZKIZ Archives


有電子無私隱 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130325/18206036

在家睇電視電影,當然係舊戲,上星期睇到一套Will Smith主演嘅「國家敵人」,講美國國家安全局NSA係奸角,迫害男主角,全天候監控竊聽佢嘅一舉一動,完全掌握佢一家人之日常行為及談話,直至男主角遇上一位前CIA厲害角色真赫曼為止。左丁山係科技盲之流,對NSA呢個國家機器嘅電子入侵能力之大,半信半疑,點知前幾日就睇到南韓有電台、電視台、銀行嘅電腦網絡可以同時癱瘓嘅現實新聞,冇法子唔驚一驚。我地普通人簡直毫無私隱,啲IT專家根本完全可以利用我地全面性、吸毒性咁樣倚賴智能電話、平板電腦、桌上電腦、上網嘅最大弱點,隨意拿取我地嘅所謂秘密,只有儍瓜先會相信,香港私隱專員會保護你我嘅私隱。
呢日午飯時間,股票名嘴L講起電腦私隱,話佢幾個月前已刪除大批資料,放落電腦垃圾桶之後再delete,以為可以永久性刪除,點知後來發覺無意中刪除咗十多份頗有用資料,又唔知點至可以recover,於是請教一位IT老友,老友記義務去佢屋企對住部電腦搞咗一個小時,竟然從已刪除資料中搵番佢已經忘記了嘅陳年舊照片。分析L為之大吃一驚:「我以為呢啲嘢已經消失晒,點解會浮現番出嚟?」IT專家向佢解釋,所謂刪除,其實係硬碟內嘅系統將一啲資料標記為「無用」而已,要舊資料真正消失嘅一個方法係不斷下載資料,將硬碟記憶體用到滿瀉,將啲「無用資料」擠出(crowding out),譬如丟掉舊電腦之前,可以下載幾十套電影,然後delete,將以前刪除咗嘅舊資料真正「擠出硬碟」,另一位分析師W話:「唔係話可以reformat過就得嘅咩?」IT專家話:「如有人針對你,譬如識得data forensics技術之人,可以從電腦嘅PC板再度recover資料,如要應付此極端情況,最好reformat之後再用鐵鎚敲打硬碟與底盤,徹底毀滅之。你地換電話由iPhone4換部iPhone5,將i4拎去先達賣,唔好以為識得搵番些少銀両,我可以將你地部舊電話內裏嘅資料全部還原!有咗i5後,將部i4踩兩腳然後掉咗佢!」左丁山聽到為之一驚,一部舊電腦本欲為咗環保理由俾人回收重用,依家要整爛佢做電子垃圾咯!

PermaLink: https://articles.zkiz.com/?id=54078

Next Page

ZKIZ Archives @ 2019