ZKIZ Archives


杜之克以舊帶新宣萱入局幫拖谷麥明詩

1 : GS(14)@2017-02-12 15:25:56

2017-01-19 NM

去年大台人事變動後,以為可以一統天下的曾勵珍遭遇滑鐵盧,主力邵氏的樂大媽基本上已被移除,三分天下,珍姐同余詠珊各據山頭外,新揸弗人助理總經理杜之克亦自組班底,搵舊人宣萱、林文龍回巢力撐外,亦招攬十優港姐麥明詩,一年三套劇一部戲力谷,策略係:以舊帶新。話喊就喊

去年底為電視劇《使徒行者2》中、港兩邊走的麥明詩,日前拖喼出現圓方,準備坐直通巴出發北上;見未夠鐘上車,於是到商場內的便利店再補倉,早有目標的她揀了幾樣日用品,即俾錢走人。上深圳開工,冇助手同行的麥明詩變身大力士,一手拎喼上落樓梯,箭步到車站上中港大巴返內地。「Louisa(麥明詩)拍完《賭城群英會》緊接就埋位拍《使徒行者2》,因為杜生(杜之克)睇咗《賭城》啲片,發現佢做戲唔似一般新人咁生硬,戲入面佢同Dominic(何浩文)做夫妻,好多場感情戲都唔使眼藥水,話喊就喊。「其實好多選美出身嘅女仔,因為要顧住個樣,所以做戲會就住晒,驚自己唔靚,但Louisa冇呢方面嘅弊病,所以杜生覺得佢有potential,力薦佢俾《使徒2》監製。嚟緊公司部大製作《跨世代》,Louisa都有份,雖然戲份唔算多,但都係一個機會。」一名無綫人說。有指杜之克睇完《賭城》後,曾在王晶面前大讚麥明詩,因此間接促成她有機會接拍處女電影《失戀日》。「係王晶提議葉念琛用Louisa,佢自己亦講明造型方面可以點玩都得,因為佢喺戲入面做一個好癲喪嘅女仔。」

貴貴都值

以「優化」為大前提,杜之克插手曾勵珍揸弗的戲劇組,力谷麥明詩外,又將離巢多年的宣萱及林文龍收歸自己馬房。「宣萱同林文龍拍完《不懂撒嬌的女人》後,杜之克又即刻搵宣萱拍《使徒2》,仲要孭正女一,佢同林文龍都唔平,要幾萬蚊一集,不過老闆都識計數,賣到埠又可以墊起公司啲新人,貴都值嘅!」一名無綫人說。

撰文、攝影、攝錄:娛樂組
PermaLink: https://articles.zkiz.com/?id=326580

Next Page

ZKIZ Archives @ 2019