只是個簡單問題 人在中環
http://manincentral.blogspot.hk/2013/03/blog-post_15.html大概是三年前左右吧。
那天早上，我在某大學的校園裡，面前坐著三個素未謀面的學生，兩女一男。
我們互相介紹，寒喧了幾句之後，很快話題就轉到去：明年她們就要畢業了。從校園走入現實的商業社會，有甚麼東西需要適應？心態上有冇乜嘢心理準備要做？
我忽然諗起一件幾年前響公司裡面發生過既事，於是便同佢地講：「我手上有個簡單既case，你地不如俾些少意見我？」
「事情係咁嘅。我公司有個女仔，Junior Position，表現一直都中規中矩既。工作左半年左右之後，忽然哮喘病復發。病發之後，佢就被迫要告好多病假…差不多每個星期最少兩日。因為身體唔好，即使冇告假有返工既日子，響公司裡面既狀態都其差，工作變到冇晒效率。如果你係我，你地會點樣解決呢件事？」
三位同學互相望左幾眼，大概係有點怕醜吧。冇人開聲。
「不如我咁問吧…」我說：「如果我要辭退呢位女同事，你地覺得有問題嗎？」
「有問題呀。」唯一既男生Herman率先開腔：「個女仔病佢都唔想架嘛。佢其實冇犯錯，受到咁樣既懲罰，好唔值囉。」
「懲罰？」我對呢個形容詞有點好奇。
「又未必喎…」Herman身邊既女孩子叫Carol：「你點知佢真病定假病？如果係詐病既話，唔通唔俾啲懲罰佢？佢有冇醫生紙先？」
「詐病？」我笑了笑：「有醫生紙的。」
「就算有醫生紙，都未必一定係真架啦。」Carol好似好有經驗：「你肯俾錢，大把醫生肯幫你開醫生紙啦。」
「車！」Herman老沒好氣：「你咁講冇得講架喎。人地俾埋醫生紙你，你都唔信，咁你憑乜嘢去求證人地真病定假病？唔通你去間醫務所道查咩！」
「咁你依家要炒人魷魚喎！」Carol俾我既感覺係三個當中比較有自信既一位，說話既聲浪也相對地大一點：「你無論如何都應該搞清楚，佢係咪真係有錯先啦。如果佢既病假係真既，咁就唔應該俾懲罪佢啦，但係如果證實到，佢啲病假係詐病的話，咁佢就死有餘辜啦。」
另一個女孩子Sophie，一直冇出過聲。
「Sophie，你覺得呢？」我問。
「我唔知道。」Sophie聲線微弱地回答。
「我不如幫你地總結一下。」我吸了一口氣：「據你地剛才所講，辭唔辭退呢個女同事，考慮既關鍵係，佢啲病假到底係真還是假。如果係真嘅話，我如果辭退佢就有問題嘞，因為佢跟本冇犯錯。但係如果求證得到，佢既病係假既，係詐病既，炒佢就係理所當然。我有冇理解錯？」
三位同學都點了點頭。
「其實…」Sophie聲線依然很微弱：「憑佢平時響office既樣，都應該睇得出佢真病定假病？如果係假病，應該冇辦法長時間扮個病樣出黎啦。」
「又唔一定…」Herman截住了Sophie的說話：「咁即使係真病，都會時好時壞丫嘛。『時好』果陣，佢個樣都未必好似病咁架喎。單憑平時睇樣，唔作得準呀。」
我微笑點了點頭。
一番討論之後，大家既說話又停左落黎。
「其實呢…」我笑了笑：「那位女同事，我辭退了。」
三位同學互相望了幾眼。
「咁佢係咪真係詐病？」Carol問。
「病係真的。」我又答：「長期病患冇得呃。」
同學們又互望起來了。故事講到呢道，其實大家諗緊乜嘢？
類似既case，響現實社會其實有好多，呢一個，我覺得算係一個比較簡單的了。我唔知睇緊呢一篇文章既你，係屬於邊個年齡層。如果你係一個出來社會工作多年，有豐富商業社會經驗既朋友，呢個case study，你一定覺得水平太低吧？
還是睇到呢一度，你心裡面不自覺地出現了一些詞語；例如「仆街」、「冇人情味」、「現實」又或者「賤格」…諸如此類？
（待續…放心，今次會寫埋下集，唔會爛尾的。）
祝大家有個愉快既週末。