香港空氣污染嚴重，但與內地城市比較，還是小巫見大巫，數星期前北京嘅PM2.5指數爆晒燈曾經達到755，成為「毒霧之都」，見到都驚。
如何解決空氣污染，簡單方法就係降低碳排放，香港特區政府環境局局長黃錦星咪講過囉，發電多用天然氣，貨運汽車全用歐盟五期標準，私家車用無鉛汽油，巴士用環保引擎，來港輪船用低硫油……總之全人類合作嘅話，空氣污染有機會大減。
老友劉創楚教授自中大社會系退休後，常居三藩市灣區，日常享受清新空氣，自然健康過人。最近佢在星島日報專欄寫匹茨堡空氣故事，值得參考。劉教授有一枝健筆，在崇基讀書時，適逢「中大學生報」創刊不久，經常缺稿，要編輯填字，好彩有劉創楚同學在，拉埋哲學系洪長泰同學一齊寫稿，兩人一齊寫，一版、兩版嘅萬言稿就會彈出嚟，而且有理有據，分析詳盡㖭，唔到各中大學生唔服，人人都話佢兩位日後會做教授，果然，洪長泰攞咗哈佛博士，劉創楚攞咗匹茨堡博士，均在大學任教。點解去匹茨堡呢？此則與著名社會學教授楊慶堃坐鎮匹大有關，金耀基、李沛良兩位皆在匹大深造，劉創楚跟住條路行而已。
劉創楚在專欄話佢在1970年代初，到達有鋼鐵之都之稱嘅匹茨堡，空氣極度污染，當地人話不吸煙人士在匹茨堡呼吸一日，等於食咗兩包煙！到咗七十年代中，美國聯邦政府限令所有鋼鐵廠必須安置清新空氣設施，令每噸鋼鐵製造成本增加五十美元，之後限制令愈來愈多，匹茨堡今天成為空氣良好城市，但鋼鐵工業由於成本高，一落千丈，唔夠日本，巴西，南韓競爭，全城轉化為高科技研究中心，好事嚟嘅，但對中學畢業，別無其他高科技學識嘅鋼鐵工人嚟講，鋼鐵廠嘅高薪工作一去不復返，佢地全部失業，半失業，領救濟金過世，空氣清新嘅代價係由佢地付出嘅。講到呢度，我地明白為何本地貨運業工人大力反對政府津貼舊車換新車啦！劉教授結論：「現實人生必須選擇，社會要決定進入現代，還是停留在傳統階段！」要清新空氣，代價還不少。 