檸檬利是 人在中環
http://manincentral.blogspot.hk/2013/02/blog-post_14.html是咁的。
作為老闆，新年返工派利是，我其實覺得有少少尷尬的。
我既習慣係咁既：HR其實每年都會為每一位同事準備一封開工利是，由每個部門既阿head負責派。由於呢封開工利是，係under公司既名義派既，做阿head既如果再派利是俾同事，就算係私人性質囉。
公司頭果幾年，我通常一返到公司，同事都會爭住黎攞利是。派利是呢樣野係意頭，收既開心派既亦開心。果陣同事們九成九都係二十出頭既單身後生女，我基本上係見人就派，嘻嘻哈哈唔駛用腦。
日子過得快，惜日二十出頭既後生女同事，唔少都已經嫁作人婦。於是乎，近年我派利是既時候，就時不時都會食檸檬：「老細，我查實上年嫁咗啦喎…」當我雙手握著利是遞向同事，同事請我食檸檬，眾目揆揆下查實好鬼死尷尬。
我認我記性唔好，邊個同事結咗婚邊個同事仲係單身，我好多時真係唔係搞得好清楚。我公司仲有同事係結過婚又離過婚，咁我又查實搞唔清，咁既case又要唔要派利是？我明白同事們對自己既status一般都「誠實」，同時我估佢地又唔想我誤會佢地結咗婚都嚟「呃利是」，所以當我派俾佢地既時候，會即刻「表明身份」。但利是係意頭嘢，我總覺得，人家派得俾你，無謂拒絕啦，何必拘泥於小節呢？
幾年前我第一次遇到咁既情況，笨頭笨腦既我即時係唔知點樣反應。呢幾年同樣既情況遇得多咗，現在就稍為懂得打完場：「咁你不如當收多封開工利是囉…」，通常都「過到關」。
今朝響公司派利是既時候，同樣既情況又出現了。
「老細，我結咗婚架啦！」
「咁牙，當封利是係情人節禮物囉。」
「情人節送利是？你冇嘢呀老細？」
祝大家有個甜蜜既情人節。