📖 ZKIZ Archives

廉價屋難推 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130110/18128386
千億富豪李兆基突然語出驚人，講到政府如將一啲荒廢、不再耕作嘅環頭環尾農地拿出來起屋，不用補地價嘅話，可興建一啲面積300呎，售價一百萬元嘅住宅單位，香港市民可以負擔得起。
當然魔鬼在細節裡，三百呎屋嘅實用比率有幾高？免補地價嘅農地由政府起居屋、公屋，由政府起樓好吖還是由私人發展商起？將來轉手炒賣如何管制？問題一籮籮，必須仔細研究。但最要害嘅，香港特區政府如將廢耕土地劃撥俾私人發展商兼且免補地價，雖則話興建廉價樓（一百萬元一間），但一定會俾社會派、厭富派人士懷疑官商勾結，鬧出政治風波，去邊度可以搵到高官孭飛噃，唔駛講一定要由特首會同行政會議拍板，以梁先生嘅民望，佢唔敢啫。
李兆基一講，就有人懷疑佢別有動機，欲圖利恆基集團，因為恆基地產目前擁有農地土地儲備四千二百四十萬平方呎，拋離居第二位嘅新地（二千七百萬平方呎），環保團體實會又驚地產商先破壞農地生態價值……總之香港並非一個可以文明理性地、冷靜地討論爭論性議題嘅社會，沒有多少人有陳弘毅教授咁冷靜，講得出「要看結果，別問動機」之言。李兆基地位高，在地產界有實力、有影響力，佢一開口，就會惹來批評、懷疑嘅嘞，老人家不如慳番啖氣好過。
大梁粉張震遠話政府未來任期內，房屋政策主要在於重建土地儲備，搵定土地在手。以此引伸，發展新界東北，市區重建，開發粉嶺皇后山軍營等，皆以此為目的。不過一有土地嘅話，用途爭拗隨之而來，上屆政府提出六大優勢產業，教育係其中之一，故此政府撥地俾哈囉起中學，撥皇后山為私立大學之用，收到九份申請書，包括耶穌會、鴨巴甸大學等。點知近期梁政府喜歡與曾政府對著幹，曾政府否決城大開設獸醫系（或動物醫學院），城大主席梁先生做咗特首後，漁護署與食環署居然派人去康奈爾大學考察獸醫系（好多人問點解冇教育局代表去？），目的昭然若揭。有位接近「接近消息人士」嘅人士話俾左丁山聽，以前曾蔭權、孫明揚、林瑞麟都係耶穌會香港華仁教出嚟嘅，依家三個人都離開政府，有邊一位會為皇后山辦私立大學出聲呀？真係咁講人治，不講制度？木宰羊。
PermaLink: https://articles.zkiz.com/?id=42667
Next Page
ZKIZ Archives @ 2019