📖 ZKIZ Archives

齊攞政府便宜 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121226/18113398
曾蔭權一走，梁振英上場，曾先生嘅「置安心」計劃立即消失得無影無蹤，置安心第一個項目青衣綠悠雅苑變成以前嘅「居屋」，在市場出售，有綠表（公屋戶）及白表（其他人）派發，於是吸引大量人群排隊攞表，白表申請者嘅中籤率素來好低，但人人聽見話有政府資助喎，合資格而唔申請者，未免有啲笨蛋，於是掀起申請「碰運氣」熱潮。
大學畢業生C小姐嘅父母來自澳門，自幼住在港島區公屋，現在因澳門好景，政府年年派錢，生活負擔又比較低，父母退休後決定搬返澳門住，間公屋就由C小姐一人獨居。C媽媽聞說「綠悠雅苑」有着數，竟然自澳門回港，去排隊攞表，輪候三個幾小時先至攞到，返到公屋，女兒C小姐放工回來，媽咪遞上綠表，點知C小姐話：「唔制，綠悠雅苑咁貴，供餐死，得咗就要交回公屋，我家去灣仔返工好方便啫，點解要住到青衣咁遠。」
哦，港島公屋好過青衣居屋，C媽媽嘆一口氣，將表格送畀一位親戚嘅失業兒子，叫佢趁未搵番一份正職之前，快啲入表，總之上一代為下一代置業之心及擔心，緊張得很，下一代反為懶懶閒。
「置安心」計劃本來係先租後買，曾先生壓落房協，房協唔敢唔搞，但老早已經有怨言，好咯，等到梁先生上台話事，梁粉鄔滿海做埋房協主席（如果唐英年係特首，鄔滿海未必可以接楊家聲做房協主席），兩人一拍即合，踢走「先租後供」方案，將整個計劃變成居屋盤，以後房協一定有運行，唔駛坐擁現金俾市建局㩒鷓鴣，亦唔需要只係做一啲蝕本項目──長者屋及舊樓維修，梁生上台，房協真係前途似錦！
從置安心計劃之轉變，可以睇得到，梁振英在溫家寶提出六項注意之中，最最緊張嘅就係「住房」，其他五項，就業暫時可以唔理，失業率低到3.4%，無謂嘥神；物價通脹率得3.8%，可暫且按下不表；老齡化、貧困、環境係十至二十五年先可以解決嘅，拖吓先啦，唯獨房屋供應短缺，土地不足，先至令梁振英心急如焚，佢係產業測量師噃，你估係西藥推銷員呀，北京以為佢係房地產專家嚟㗎！
PermaLink: https://articles.zkiz.com/?id=42065
Next Page
ZKIZ Archives @ 2019