六十年前 左丁山
http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121123/18076287財務A結婚，於11月17日中午在彌敦道聖安德魯教堂舉行婚禮，教堂內坐滿賓客，為新郎新娘祝賀。教堂雖然古老，起碼有110年歷史，但內裏嘅AV設備，追上時代，講壇前有螢幕自天花吊下，牧師講經與聖詩班唱聖詩時，英文中文字幕即時出現，觀眾一目了然，牧師訓勉之後，眾立、唱Amazing Grace，因有歌詞打出在螢幕上，所有賓客包括左丁山都唱埋一份，好似係集體唱卡拉OK，幾趣緻也。
婚禮過後，退休賓架W話要趕住去中大上課，告辭先走，因有順風車可坐，左丁山連忙跟隨，佢去中大上堂，我去沙田馬會與家人會合，一舉兩得。問賓架W上甚麼課呀，退休後有幾樣公職，忙到不亦樂乎，星期六早上先至開完長策會，跟住趕嚟參加老友婚禮，然後到中大上課，仲忙過做銀行董事之時。賓架W話，讀書乃興趣，在中大修讀一個比較歷史碩士課程，讀得好爽，點可以走堂。
講起呢個課程，資深廣播人吳明林讀過，已經畢業，記得佢又係話過讀中大比較歷史越讀越上癮，周圍介紹人去讀，吳明林上個星期來電，在十一月廿四日星期六下午三時在天光道／合一道新亞中學開壇講神話，叫左丁山搵人捧場，左丁山話一早知道嘞（見昨日本欄），只係擔心公眾期望過高，將佢地呢班有心人與昔年（1954/1955）新亞文化講座相比啫，六十年前嘅歷史點可能會在今時今日嘅富裕香港重演吖。錢穆先生在《新亞文化講座錄》有如下記載：
「新亞書院之始創，艱窘達於極度，同人心力無所展布，乃於日常授課之餘，週末之夜，特設文化講座。除同人主講外，並邀在港學者參加，以社會人士為聽講對象，而新亞學生亦參列焉。其時，新亞校舍在桂林街，隘巷穢濁，樓梯窄而黝，盤旋而上，每不得踏足處，講室設座，無憑無靠，危坐不能容百席，而寒暑風雨，聽者常滿，新亞學生僅能環立於旁。」當是時也，香港滿街滿巷都係南來難民，身無長物，食用不足，面有菜色，尤有興趣到陋室聽饒宗頤講《文心雕龍與佛教》，任泰講《西方的詩學》，謝扶雅講《基督教與中國文化》，今日即使搵番同一級數嘅人（按：今天搵唔到如此人物）主講同一題目，供應埋精美茶點，怕亦不會見到「聽者常滿，新亞學生僅能環立於旁」嘅情景。