📖 ZKIZ Archives

fb毒害 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121119/18071268
連續三個周末有朋友結婚，嫁人，或嫁女，收到請帖之後，秘書就會係咁意講聲：「買禮券五百蚊呀？五千蚊呀？」秘書一邊講，一邊望，分明態度不嚴肅，做五千蚊人情？食自己隻車呀？做五百蚊？今時今日，好似少啲噃。秘書話：「同你開玩笑咋！你知唔知有80後喺facebook講及五百元人情，俾人鬧到爆，重俾啲網民做人肉搜尋，揭開佢嘅私隱㖭呀！」
呢類八卦嘢，左丁山素來唔理，凡係有老友在fb話要左丁山做friend，左丁山一概拒絕，亦唔睇facebook，可能係古老啲，但見到啲年輕人將個人大小事情一概擺上fb，以為好透明，好好玩，誰知偶一不慎，好似嗰位準新娘咁，講大一句半句，就為自己惹來好大麻煩，真係何苦來由。網民擅於將小事化大，人家講吓五百蚊人情啫，關其他「非朋友」乜事，搞到好似文革式批鬥咁，冇正經事好做咩。
在fb發源地美國早有獵頭族及僱主警告過青少年，將自己嘅私隱過份在fb曝光，將狂歡時嘅飲酒、半裸體、裸體、飲酒圖片放上網，會成為永久網上紀錄，剷之不去，畢業搵工之時，獵頭族或僱主可自互聯網上找到，對求職者容易產生不利影響，假若成年後從政做咗公共人物，仲弊，隨時會俾政敵找出來玩到盡，質疑誠信問題。
更有甚者，年青人慣於凡事擺上fb，染上習慣之後，出到社會做事假如唔識檢點，郁下就將公司會議事務在fb透露，或者批評上司，批評公司，洩露公司商業秘密，隨時會被炒魷或甚至惹上官司麻煩。一啲公共機構嘅委員會如有80後委員在座，委員開會時發言，極其小心，誠恐幾十分鐘之後，自己發言（本以為係直率之言）就會俾人放咗上fb，傳到全世界，弄到灰頭灰面。長此以往，有何後果？一個可能性就係委員會內疑神疑鬼，主席會預先與自己友辯論、傾妥一啲方案後至放上委員會議程，開會時人人做戲，講啲門面說話，即使俾人放上YouTube，亦唔駛怕，預早講好嘅方案咪照劇本投票通過囉，fb加上simple and naive思維，更加添增人與人之不信任，互相猜疑！
PermaLink: https://articles.zkiz.com/?id=40076
Next Page
ZKIZ Archives @ 2019