📖 ZKIZ Archives

買產品似做戲 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121118/18070027
股市連日下跌，返回一個月前水平，如果一個月前離開股市，去外國旅行回來，還以為乜事都冇發生過。一位朋友聽講在家安置幾部電腦，同時睇住，好似身處證券行「炒房」（dealing room）咁款，以往每年都搵到唔少，但一年幾以來，股市一係上落太大，一係牛皮唔郁，好難搵食，日日入市即係替銀行或證券行打工，最近索性「暫停營業」，熄埋電腦，周圍去享受美食好過。
最近有一位女讀者來電郵，話自己係投資新手，問左丁山如何選擇基金，唔，呢個題目太大，左丁山唔敢答，以免答錯，誤了他人，請女讀者向註冊財務策劃師查問好過。
自金融海嘯之後，雷曼後遺症餘波未了，金管局在立法會壓力之下，大力收緊銀行出售投資產品嘅空間（例如錄音），令銀行之銷售成本大增（時間即金錢也），兼且熟客怨聲不絕，即如左丁山某次接到銀行電話講定期外幣存款到期，自動延長一個月，於是順口講埋：「不如將我嘅美元儲蓄存款轉番做港元。」銀行職員話：「哦，對唔住，要錄音，我地重新嚟過」，適逢左丁山在街上追緊的士，邊度得閒錄音吖，於是作罷，唉吔，依家話有熱錢來港喎，美元跌，港元升，左丁山蝕咗水㖭。
呢日私人銀行家Ａ請客，講起金管局以前嚴查銷售規則，但最近居然關注到：「你地覺唔覺生意多咗還是少咗呀？」賓架Ａ話：「有此一問，顯示態度有改變，乜唔係吖，不少外資行費事麻煩，又怕出錯，往往約東南亞客戶到新加坡買產品，傾投資，懶理香港咁多規條，我地梗係有生意流失啦。我地銀行嘅行規硬性規定客戶經理要向客人宣讀一份風險聲明，三張紙咁長，經理們讀得多，竟然可以急口令咁一分鐘讀完，問你服未！」如此說來，銀行與客戶（當然係熟客）幾識得為做戲而做戲，為錄音而錄音。賓架Ａ再講：「讀完要再講，呢個投資可以蝕到清光，請你留意！」連客戶買簡簡單單嘅美國國庫債券都要講埋呢一句，咁鬼形式主義，皆拜雷曼迷債所賜！
PermaLink: https://articles.zkiz.com/?id=39906
Next Page
ZKIZ Archives @ 2019