📖 ZKIZ Archives

樂富商場 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120930/18028030
老友P約吃午飯，話明由佢做主場，唔到中環灣仔遷就左丁山，佢在電話講：「帶你走出港島旺區，周圍發展得幾快，你要走出中環，嚟體驗嚇」，佢第一個提議話 去大埔大元街市，左丁山嚇咗一跳，唔識噃，點去呀？老友P話大元街市可能係全香港最新穎嘅街市，帶張八達通可以買齊菜肉鮮魚雞，兼且乾淨企理，街市內有靚 嘢可食，哎吔，由中環去大埔食午飯，始終係太遠，留番星期六日再與家人揸車去搵啦。（後來先知道，蘋果日報副刊有成版講大元街市。）拉扯一輪，卒之達成協 議，去坐地鐵可達嘅樂富商場。講起樂富，回想番好似十幾年冇去過，以前去樂富，出咗地鐵就入吉之島，買完嘢就搭番地鐵鬆人，甚少行十分簡陋嘅商場。
呢 日坐地鐵到樂富，譁幾乎唔認得咯，乜咁新穎㗎，雖然唔及又一城咁正斗，但同印象中之房委會商場完全不同，而且人流不少，週中午飯時份睇嚟有不少人來此吃飯 購物，好快就搵到「美食廣場」，見時間未到，於是行咗一個圈，裝嚇啲價錢，見到有一間嘅價錢幾平民化，一碟飯賣32元，但有食客在門口排隊輪號碼嘅，就係 一間價錢較高嘅上海菜館。咦，原來老友P就企在門口，等左丁山行入去。
屋邨商場大變身，追上時代潮流，幾啱樂富區現狀吖。一位親戚表弟以前讀書 時，佢父親在老虎岩街邊賣燒味，佢幫完老竇手就坐在生果箱讀書，因升中考試成績好，竟然派入皇仁書院，在沒有地鐵年代，由老虎岩去皇仁返學，可說路途遙 遠，但因為入到皇仁而考到港大，後來成為工程師，老竇年老唔駛再在街頭開檔咯。老虎岩已成為樂富，數十年前入住嘅徙置區公屋人士，不少已成為中產，子女有 成者甚眾，屋邨商場變身成為比較現代化商場，係好自然一回事。飯後再在美食廣場（Food Square）行一轉，見到有一間劉裕發茶莊，名字似曾相識，入去睇嚇，咦，乜嘢名茶都有得賣，唔會差得過名店英記茶莊噃，老友P話呢間茶莊於1972年 在東頭邨開始，在樂富商場經營三十幾年，係地區老牌名店嚟㗎，唔怪得啦，呢塊招牌以前係見過嘅，老店能追上時代，穩步向前，不受潮流變化所淘汰，可喜也。

Eric Shiu
樂富係領匯既示範商場,
凡係有咩政府官員, 外來家賓,
領匯定必係帶佢地到呢個商場參觀,
只可惜風光背後, 係欠缺人情味既瘋狂加租,
同時亦因此趕走左唔少小店老舖,
早前攪個"尋味時光", 被轟加租逼走老舖
都要急急終止宣傳
回覆 · 5 ·
· 7 小時前

Chris Lam · 留言最多的人
成篇文其實'領滙上市應該,加租趕客有理'講曬, 不過要呃稿費至寫咁長, 好心啦
回覆 · 5 ·
· 5 小時前

Hinhing Wu · 留言最多的人
左先生，有D店舖「受潮流變化所淘汰」唔係經營不善，而係俾高地價、高舖租逼迫。一間茶葉莊在舊式商場或可經營幾十年，在領匯旗下嘅商場能開幾十年？唔好同我講秋天的童話。我每日都行經新界領匯某商場，幾年來店舖招牌頻換，宛似走馬燈，「賺埋都唔夠交舖租」往往是執笠店主嘅呻吟，君可知否？租貴，物價便貴，生活艱難，工資要調整；工資調整了，物價又再貴，業主喜出望外又可加租了......呢種惡性循環講得太多了。只係有D人總係食米唔知米價。
回覆 · 4 ·
· 3 小時前

Sew C Ho · Chinese University of Hong Kong
橫頭磡同樂富村都係老區、亦係窮區, 有10%家庭領取綜援
自領匯中產化之後, 街市價格上漲, 區內人士就要搭車去黃大仙買菜。
領匯有幾好 ?
回覆 · 2 ·
· 4 小時前

Patricia Wong · 留言最多的人 · Hong Kong · 343 個追蹤者
生活在中環的商家佬紓尊降貴去樂富商場食碟頭飯，返嚟寫篇文真人示範咩叫何不食肉麋。

就以大元街市為例，領匯強逼小租戶裝八達通機，仲會抽當中1.5%生意額(或更多)。「全個街市都用到八達通」聽落好似好好咁，但最大部分嘅 end-user 譬如阿婆師奶，點會用八達通買餸？再者好多人根本唔知可以用八達通付款，領匯零宣傳，小商戶比咗錢裝咗等於無裝，亦增加咗經營成本。

而領匯最耍家當然係瘋狂咁加租逼走小商戶，就算你肯交貴租都唔會租比你，因為佢要留返啲舖位比連瑣店，諸多藉口嫌你型像唔好就會趕你走，唔肯續租；或者要你三不五時就裝修一次，你叫小商戶點頂。

商家佬最鍾意叫人比個數據出嚟，敢問左丁山先生又有無數據實際話比大家知有幾多「數十年前入住嘅徙置區公屋人士，不少已成為中產」人士係住喺徙置區公屋呢？

係囉，吹水永遠都係好容易㗎喎！
回覆 · 6 ·
· 5 小時前

    Anthony IP · Tsukuba University
    咩叫大PR？搵野讚囉。32蚊如果叫平民化，果Ｄ排幾個鐘輪4蚊飯盒果Ｄ係咩人呢？賤民？仲有，仲要提個尋你老味既老牌子做結尾，講到領匯好似好識得咁樣「保存香港文化」咁，情況同以前有Ｄ國家……捉Ｄ獅子老虎入動物園，之後就殺曬其他動物，有咩分別呢？
    回覆 · 4 ·
    · 4 小時前
    Peggy Tsang
    重點係就算有人變咗中產，都唔代表香港少咗草根！$32 食個碟頭飯，唔好話草根，連我都覺得貴！佢究竟知唔知香港家庭月入中位數幾錢？夠食幾多碟頭飯？
    回覆 · 4 ·
    · 2 小時前
    Dennis Lai · 留言最多的人
    香生一向讃同香港要不停發展, 商店要不停加租, 土地要不停發展. 32蚊一餐飯對好多草根階層都係好貴, 不過對香生呢D中環精英呢講, 32蚊算都係咩?!
    回覆 · 3 ·
    · 約 1 小時前

還有 2 個留言
Terry Pang · Walla Walla University
我的簡單體驗是領匯概念是不錯，起碼“商場”已改善了環境(例如：洗手間)，事關我行走新與舊商場時有所體會。我只想領匯不賺盡(小商戶租金)，不虛偽(假人情味)，不歧視(舊有特色小商戶)。我自己想都是比一句“為股東爭取最高利益”害死。事關有沒有人願意註明不買／罷買領匯股票，即使它為你賺錢（尤其退休金部份），因為它不符合我們的人性標準，雖不理性，但我相信只要對方feel到有真真正正火藥味(錢)，管理層會知如何回應！
回覆 · 1 ·
· 約 1 小時前

Chan Yiu Fai
香樹輝真係不食人間煙火！
回覆 ·
· 28 分鐘前

Henry Wong · 留言最多的人 · Hong Kong
左生要申報利益, 有可能自己公關公司領匯係大客, 經常專欄軟銷....
回覆 · 1 ·
· 2 小時前

Happyicy Ng · 留言最多的人
其實樂富比未裝修前, 人流少咗好多。
回覆 · 1 ·
· 4 小時前

Robert Tse · 留言最多的人 · The Open University of Hong Kong
就放長雙眼睇呢間「劉裕發茶莊」做得幾來......
做唔到既，記住佢呢句「不受潮流變化所淘汰」
回覆 ·
· 約 1 小時前