📖 ZKIZ Archives

領隊偏見 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120927/18025608
週末睇英超，揀車路士對史篤城、利物浦對曼聯、曼城對阿仙奴，三場加埋有六個入波，而且每個入球都得來不易，除咗顯示出守方守得嚴密之外，其實攻方並無特別煞食招數，唔多唔少反映出各位領隊（費格遜除外）嘅個人偏見，影響球隊。
最 令人失望嘅當然係利物浦，今季開戰五仗不勝，得兩分排名第十八，屬降班名次，一百年來最差成績。利物浦如果今季降班，會係球會大災難，美國班主大災難，左 丁山相信唔會，但以目前球隊嘅前鋒攻力咁差，對邊隊英超球會都無勝利贏波把握。對住曼聯，上半場佔盡優勢之下，只靠蘇亞雷斯嘅優秀腳法入攝，傳中球全無人 接應，高空波完全冇人頂頭槌，不期然令人諗起，領隊教練Rodgers開季前已話柱躉中鋒卡路爾唔啱佢嘅傳中滲入戰術，八月底就將卡路爾借去俾韋斯咸，買 入意大利前鋒波連尼，於是前鋒毫無衝刺力量，遇到對方密集防禦，利物浦就不知所措。
不用中鋒，原是巴塞隆拿嘅招牌踢法，巴塞咁成功，大球會紛紛學 習，但人哋巴塞有美斯、沙維、恩尼斯達三大支柱，幾乎所有球員由細玩到大，合作慣熟，自動走位，組織美妙。利物浦、車路士、曼聯、曼城及阿仙奴邊有呢啲條 件呀。阿仙奴學到似巴塞B隊；曼城學到五六成，關鍵入球還是要靠步大力雄嘅中場耶耶托尼殺入禁區破敵；曼聯叫做話有四大前鋒，其實中前場傳送不足，雲佩斯 只能在前面行行企企；車路士學打五個中場，短傳滲入，費托一個前鋒無衝鋒陷陣能力，令人懷念杜奧巴。
領隊主宰球隊戰術、陣形及球員出場時間，往往 受個人喜好所影響，費格遜爵士近年喜用新人，但仍然留住兩位老鬼傑斯與史高斯，唔係佢有人情味，而係佢瞭解以舊帶新，經驗與朝氣同樣重要，反之雲格一味用 新兵，球星未到29歲就要出售賺錢，隊內新人太多，好睇而不實用，故此近七年來四大皆空。車仔迪馬提奧遵從班主油王之吩咐，要踢悅目足球，今季全用技術性 球員，唔夠硬淨，羅渣士未有帶領大球會經驗就學人搞改革，前途令人擔心，做管理人唔能夠完全貪新忘舊嘅，新人太多，棄用老鬼，最受害嘅就係管理人與球隊， 商業機構亦可作如是觀！
PermaLink: https://articles.zkiz.com/?id=38041
Next Page
ZKIZ Archives @ 2019