ZKIZ Archives


時勢逼人 左丁山

2012-7-11  AD
http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120711/16502268

港僑M未移民加拿大多倫多之前,已奉公司命,長駐北美,在多倫多,三藩市之間來來往往,於是退休後就在多倫多落戶,但因仔女在加州讀大學,於是在三藩市,Palo Alto都買咗屋。上星期,港僑M與太太回港一行,仍然住在離港前老地方,中半山一間千六呎舊樓,佢來電郵約食飯,指定要左丁山預訂鏞記,等佢嚐吓香港美食。
去鏞記咪鏞記囉,呢輪鏞記有所謂「不同滋味」,每日限量出售招牌老菜式如「董事長珍賞腐乳」、「惹味欖角烏魚扣」、「旺來薑芽煀乳鴿」、「荷香西蘭花鱔片」等等,加上清湯腩,燒鵝髀,點食得晒呀,後來夥計話烏魚扣已經銷清,冇得食,剛剛好,味味正斗,港僑M話加拿大冇燒鵝食、加州冇鵝肝食,吃魚翅當吸毒咁大罪,食嘢都係返嚟香港好。當然啦,成條威靈頓街不知有多少食肆,嫌鏞記貴呀,可以吃華豐叉燒,麥奀記雲吞麪(真係好靚嘅呢),一間越南菜館芽莊午晚有人在門口排長龍,更便宜啲,轉落史丹頓街有大牌檔,食到你唔食,吉士笠街有一小型大牌檔「水記」仲威水,賣清湯牛腩米粉,好似係二十蚊一碗,味道甚佳,可以大牌到話:「天氣酷熱,逢星期六日休息」,梗係搵到銀先至可以星期六日休息啦,有錢邊個想一星期工作七天?
吃得過癮之餘,不忘稱讚M君:「美國報紙話由於科技公司好景,爭相往三藩市開設辦事處,科技界職員鍾意住在三藩市,你在三藩市與 Palo Alto兩間屋,升晒值啦?」M君話:「係嘅, fb上市又製造出好多百萬美元富翁,我好彩十幾年之前科網股未狂熱買咗兩間屋啫,依家買唔起咯!」M太插嘴:「其實點升都唔夠香港升得咁快,今次返嚟睇地產舖廣告,我地間四十幾年中半山大廈單位,又試升晒,我都覺得價錢高到離譜,好彩移民嗰陣諗住每年回港一次,要搵地方住冇賣到層舊樓啫!」曹仁超成日教訓左丁山,永遠係時勢造英雄,絕無英雄造時勢,投資要睇大勢、大氣候。佢係啱嘅,M君假如當年在港賣樓移民落戶阿里桑拿州買樓嘅話,今日點會有心機到鏞記嘆燒鵝髀!


左丁山

PermaLink: https://articles.zkiz.com/?id=35042

Next Page

ZKIZ Archives @ 2019