冰說聰明：小米上市概念股
1 :
GS(14)@2018-01-22 05:52:38恒指迷失了十年零三個月，終於在昨天創收市新高，成交越來越大，1,300億樓上變成常態，但距離史上最癲的2,915億，暫時只係一半貨仔，所以現時市況熱唔熱，是否亢奮，真係半杯水理論，睇你認為係半滿定半空。就咁睇恒指，我們十年好像毫無寸進，但用整個交易所的總市值黎睇，我哋已經由2007年10月底的23萬億增至今星期的35萬億，增長咗5成，唔算太差呢，只係個指數裏，太多內銀內險，加埋匯控（005）、友邦（1299）、恒生（011）及港交所（388），金融板塊佔49%比重，是否合理及有代表性，見仁見智。但咁啱呢十年內銀內險係非常艱難的時期，除了平保（2318），冇一隻喺歷史高位，咁已經解釋到呢十年我哋衰咩。去年5月光大銀行（6818）以溢價48%配股，集資310億人仔，因為國家唔畀賤賣國家資產，至少都要1倍市賬率先可抽水，戰友可以google吓當時的評論，大部份都看淡內銀，話抽水潮陸續有來，揸內銀收息真係要諗清楚。好喇，建行（939）、工行（1398）呢8個月升得唔多，只係三成（笑），剛剛來到1倍市賬率，國內不斷吹話今次健康牛市要去槓桿，可能上半年係好時機啊。要搞活金融市場，先有得配股抽水，現時A股成交唔算多，但隨著年中加入MSCI，及下半年有同股不股權的股來港上市，成交只會繼續增加。按近期的消息睇，打頭炮的好可能係小米，目標估值係1,000億美元，初步選定高盛、大摩及中信證券（6030）為保薦人，再加上早幾日陸金所上市的傳聞，即時帶起了久沉的國內劵商股，青冰一直留意中信證券的走勢，借小米的消息，昨天創下21個月新高，成交大增，如今浪係大時代2.0，冇理由現價係當年的一半。現時A股成交只有五千億，距2007年的二萬億，簡直唔入流，所以如果你看好A股，除了ETF之外，龍頭劵商中信證券應該係不錯的選擇。青冰
http://fb.com/chingbing888本欄逢周四刊出
來源:
https://hk.finance.appledaily.co ... e/20180118/20278183