📖 ZKIZ Archives

暑期工 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120616/16430023
時近暑假，好多大學生已經做緊暑期工，呢啲暑期工與在麥當勞或茶餐廳嘅暑期工不同，並非純粹要搵錢，而係要整靚張 CV。現在好多家長相信「不要輸在起跑線上」嗰一套，懷胎十月時已為子女向國際學校幼稚園報名，孩子六個月大就去參加 playgroup，以至甚麼 baby gym，左丁山視之為奇聞，但會計師 Y就視為必要，呢位靚女昔日讀會計系二年班去四大核數師行之一實習，暑假完畢，就獲得聘書，三年級時一考完試就去返工，眨眼間已成為經理級，待升合夥人， 係唔係盛女呀？當然唔係，靚女讀大學時已俾男同學追，結婚無難度啦，去年誕下愛女，家話參加咗「嬰兒健身學校」，練習爬行肌肉喎，每個月上課要幾百蚊！
比 會計師 Y大二十年嘅船務 S就老早緊張為兒子搵暑期工，在律師行實習，左丁山問律師 C：「點樣計人工，學乜嘢？」律師 C話：「老實嘞，我地請暑期工分兩種，在本地大學讀法律系嘅，做暑期工有專業需要，我地俾三四千蚊一個月，不受最低工資法例限制。船務 S位公子在美國讀商科，嚟我度純粹為爭取工作經驗，待畢業後求職，話俾人聽自己有工作經驗啫，呢類學生我要俾最低工資㗎，可大可小，我唔會俾好多錢，要佢 地返每日朝九晚五，中午一小時吃飯無薪，一星期返五日，每個禮拜開工三十五小時，出糧九百八十元，逐個星期計，我地夠曬靈活。」
咁講法，暑期工學 到幾多嘢呀？聽講做影帝影后，上庭抄紀錄就算嘞，根本所學不多。左丁山對船務 S講：「咁你不如送個仔去讀暑期班啦，例如北大普通話班，清華中文班之類，學好中文仲更加有用噃！」船務 S話：「舊年暑假去咗北京啦，學費幾貴，今年啲工資補唔番！」梗係人人識計數，每週薪水九百八十元，勉強夠佢搭車到中環來回與吃午飯，不過識嚇人都好嘅， 加強社會網絡先至係提升真正競爭力。（按：社會網絡不等於在 fb話俾人聽我在翠華吃緊魚蛋粉！）
PermaLink: https://articles.zkiz.com/?id=34360
Next Page
ZKIZ Archives @ 2019