栢芝情人節dry到爆？茵媺陳豪圓方晒幸福！
1 :
GS(14)@2017-02-18 00:51:24三年抱三嘅陳豪同陳茵媺( Aimee)，先後咁生咗兩個小王子梓燁、浩鋒，同小公主凱婷後，雖然榮升咗做爸爸媽媽，但日前情人節，陳豪都好有情趣咁，約咗老婆去圓方睇戲戲，眼見產後仍未收晒身嘅Aimee，依然好饞嘴咁要買爆谷、熱狗，同老公邊食邊睇戲，認真sweet呢！情人節當日，4時許，發現帶住口罩嘅陳豪，喺圓方嘅女廁門外等人，等咗冇耐，就見到Aimee出嚟，跟住陳豪就搭住Aimee嘅膊頭，一齊行咗去戲院。唔知佢哋係咪驚情人節多人睇戲呢，驚去到冇飛賣掃興，所以陳豪BB一早已經喺網上訂咗票，去到戲院就一齊咁去咗自動取票機度攞戲票。攞完飛，佢哋就去咗小食部，買咗爆谷、熱狗同咖啡，而Amiee仲試食爆谷先買，攞咗熱狗後，陳豪就去幫熱狗「扮靚」，加茄汁、芥末等，其間有粉絲見到佢哋兩公婆，就好似見到利是咁開心，要求同佢哋合照留念，佢哋兩公婆當然好樂意同粉絲合照，之後就入場睇戲。另外，張栢芝就係情人節當日，撇低兩個囝囝，相約經理人Emily同兩個女性友人，去咗港麗酒店食自助餐。由於當晚係情人節，有好多情侶食自助餐，栢芝見到周圍都好多人，都有啲避忌，不時以手遮面，食到差唔多完嘅時候，佢哋四個女人就攞咗啲戰利品出嚟一齊分享，而柏芝就拆開咗一個粉盒，同姊妹們一齊研究，研究咗一陣就結賬離開。離開時，酒店預備咗玫瑰花，送俾在場女士，但栢芝就冇要到，送埋俾同行嘅朋友。
來源:
http://hk.apple.nextmedia.com/entertainment/art/20170217/19931151