ZKIZ Archives


【專題籽】孖B成長記 34歲孖仔:冇心靈感應囉

1 : GS(14)@2017-02-12 13:55:36

34歲的大孖寶霖(右)和細孖寶棋都覺得兩人越大越唔似樣,讀者又點睇?



【專題籽:胚芽故事】近年,好像越來越多雙胞胎,根據醫院管理局的數字,香港於2015年就有673對雙胞胎出生。常常覺得雙胞胎或多胞胎是很奇妙又奇怪的一件事,人生中,竟然有個和自己外貌、高矮肥瘦都近乎一樣的人共同成長,但其實在真.孖仔的心目中,又是怎樣想的?雙胞胎父母,又有甚麼體會?



聯絡過不少長大成人的雙胞胎,絕大部份都不願上鏡,因為怕醜怕尷尬,不想別人知道世上還有另一個「我」,肯上鏡的,感情一定好得交關。對於雙胞胎,很多人都總有一份好奇,今年34歲的許寶霖(大孖)和許寶棋(細孖),每當遇到新朋友知道他們是孖仔,總會被問三個基本問題:「係咪有心靈感應?」、「出世爭幾多分鐘?」、「會唔會鍾意同一個女仔?」大孖笑說:「心靈感應真係由細被問到大,都有少少煩,因為我哋覺得冇吖嘛,雖然好多情況好巧合,但我哋唔覺係囉。」二人由幼稚園到大學都同校,大學又試過宿舍同房,喜惡都極相似,同樣喜歡王菲,喜歡打排球,更一起打入校隊和港隊,又喜歡紮高辮的女仔,更神奇的是,連睇戲都會心有靈犀地討厭同一個角色,「會一齊話好悶,唔睇飛咗呢part。」小時候瞓上下格床,半夜三更會同一時間扎醒,衝去父母房間搶位瞓覺,其實他們還有個年長三年的大哥,「好明顯同佢係冇咁close,我哋會聯成一線對抗佢。」三十多年來,二人每年都一起過生日,惟獨有一年細孖去了內地工作,獨自在異地過生日,兩兄弟當天不約而同上載了一張慶生照到facebook,竟發現兩人都穿了件黑白橫間T恤。訪問當天,二人沒有事先夾過,卻分別同樣穿上了黑色上衣和深色長褲,又戴上了同款頸鏈和手繩。以上種種,真的沒有心靈感應嗎?我先唔信。



二人小時候連影相都一同皺眉,這張相連母親和他們自己都分不清。

青少年時期的細孖(左)臉型較圓,總算讓人較易分辨。

兩人是排球場上的好拍檔,曾一起代表香港出戰世界大學生運動會。


小學調包上堂 冇人發現

經常幻想孖胎可以有些不一樣的經歷和玩意,原來是真的,寶霖說:「小學我哋唔同班,試過有次貪玩,調轉班房上堂,我當時做班長,前一晚仲教佢(細孖)點派簿,要記住同學啲名,調換咗一堂就好驚,跟住分番開,但完全冇人發現。」這對外貌有九成相似的兄弟,還有很多東西可以共同使用,「讀書時好多時要用學生相,唔夠用都會借對方嗰張相用住先。」二人還是排球場上的好拍檔,曾一同打入校隊和港隊,最記得有一次二人分開兩隊作賽,細孖先打一場,大孖打下一場時,中途被球證吹雞暫停,「佢質問我點解一個人打兩場,隊長就解釋我哋係孖仔,但對方唔信,仲話唔好用呢啲爛藉口,我就衝去拉細佬過嚟畀球證睇,佢就O晒嘴。」從小到大,兩人被認錯的次數多到數不清,大學時二人同校不同科,獨自在校園遊走時,情況仍然持續,「如果有人同我哋打招呼,就算唔識,通常都會慣性say hi,冇嘢問就算,但如果再有問題就會解釋,話其實我係佢細佬或阿哥,再解釋我哋係孖生。」記者聽後覺得好笑,但二人卻視為食生菜般平常。二人投身社會後做不同的工種,大孖做紀律部隊,細孖從事物流業,連帶性格也越來越不同,一個粗獷急躁,另一個就細心慢活,但二人感情不變,就算其中一人拍拖,只要不是大時大節或特別日子,都不抗拒三人行。雙胞胎小時候通常被打扮得一模一樣,但長大後就會刻意營造自己的風格,硬要和另一方不同,以凸顯自己個性,但這兩兄弟卻不然,二人身高和體形近乎相同,絕不介意開心share互相的衫褲鞋襪、手錶飾物,「如果有啲心頭好唔想share,會自動自覺唔拎,但唔使開口講㗎喎。」



幾年前第一次分開兩地過生日,竟也不約而同穿上同款T恤,心靈相通囉。

他們還有個年長三歲的大哥(中),但關係明顯較疏離。


鍾意同一個女仔 「都會爭過」

在排球場上,他們也是合作無間,最有默契,不用眼神和手勢,都會估到對方的攻勢和策略,兩人因為撞樣,身高僅168cm較矮小,所以經常受到注目,他們都喜歡自嘲:「打排球通常好高,我哋成日被人問點解咁矮,都會答本身係好高,但因為twins嘛,身高分咗一半畀對方,如果唔係可能就會有190cm囉。」每當去到新環境,他們都很易與人打開話題,「就算記唔到名都記得係孖仔。」不過,其實孖胎也為他們帶來一點煩惱,細孖說:「好多時我講咗啲嘢,其他人都會以為阿哥都係同我一樣咁諗,變咗好多時我做事前要諗吓會唔會影響到佢,因為會連帶影響人哋對佢的印象,呢樣係好唔方便嘅。」兩兄弟感情再好,也有鬧交的時候,兩人都性格火爆,「成日都鬧交,但好快冇事,唔使冷靜期。好多事都唔需要講,稍有點不妥,另一方總會sense到。」他們更sweet得連緊急聯絡人和保險受益人也寫上對方名字,而非父母或另一半,感情好到咁,假如將來真係鍾意同一個女仔,點算?「應該都會爭過,始終係獨立個體嘛!」二人對望一眼,然後異口同聲說。



記者:黃子配攝影:王國輝、徐振國(部份圖片由受訪者提供)編輯:謝慧珊美術:楊永昌




來源: http://hk.apple.nextmedia.com/su ... t/20170212/19924264
專題 成長 34 歲孖 孖仔 心靈 感應
PermaLink: https://articles.zkiz.com/?id=326569

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019