Do姐為執靚樣P到巨胸翠如變ET
1 :
GS(14)@2017-01-23 07:45:14今時今日喺相機行先嘅世代，好多人影完相都第一時間擺上網，同朋友開心share，而時下又有唔少美圖Apps，美白瘦面磨皮修身功能要乜有乜，藝人話晒靠樣搵食，執靚個樣都無可厚非，可惜由於唔係個個都係P圖高手，所以時不時都會出現P到過晒火嘅情況。
DoDo鄭裕玲日前喺商台節目《口水多過浪花》，訪問呢排宣傳緊新戲《小男人週記3之吾家有喜》嘅阿旦鄭丹瑞同巨胸翠如鄧月平(Larine)。通常做完節目，DoDo都慣性會將自己同拍檔余迪偉、麻利再加受訪者嘅合照，放上Ig。不過平時做大騷，執生了得嘅DoDo姐，執相技術就似乎麻麻地。睇番DoDo出事張相，DoDo姐皮光肉滑冇乜走樣，不過企佢隔籬嘅鄧月平，右邊額好似俾人打咗一拳咁──凹咗，仲要嘴歪加哨牙，真係同平時巨胸翠如個樣差十萬八千里……經好心網民提醒，DoDo用咗唔夠10分鐘，就刪咗出事嗰張相，貼返原相出嚟，而巨胸翠如就好似食咗還原靚靚拳咁，話咁快變番個靚樣！事後有網民讚DoDo實事求事，話改就改，做事絕唔會拖泥帶水咁話。
來源:
http://hk.apple.nextmedia.com/entertainment/art/20170122/19905308