ZKIZ Archives


3測量師轉行做地產代理

1 : GS(14)@2017-02-06 07:25:19

■Eric(左)、Ray(中)與Alvin三人轉投海外物業銷售,盼賺返「應得的收入」。 黃嘉銘攝



【地產專題】「量地」或許是測量師的專業,不過,三位30歲出頭的工料測量師,嫌「量地」工作沉悶刻板,轉投做海外物業銷售員,望搵快錢一圓成家立室和置業夢。三位出身於老牌建築公司協興的工料測量師,分別名為范俊楊(Alvin)、龍子康(Ray)及劉振衡(Eric),過往擁有一份穩定收入,三人工作時認識,甚至在同一地盤,同一個貨櫃一齊返工,聚頭時的話題離不開金融、經濟及地產。所謂「做果行,厭果行」,年多前三人對測量師的工作覺得沉悶,Alvin說,做QS(工料測量師)就只是計數、睇圖,做report,得好少機會落地盤,以文職工作為主,無乜挑戰性,而且做測量的晉升前景,「幾時搵到幾多錢,全部有數得計」。Ray亦說「做QS一定有Model Answer」,欠缺挑戰性。


「靠打工好難搵首期」

眼見本港樓價持續高企,龍子康直言如果「單靠打工,實在好難搵首期」,想置業,就要在打工以外,找投資同創業的機會。適逢工作上認識一位馬來西亞人,穿針引線下,去年10月成立一間名叫飛騰的公司代理馬來西亞樓盤,每個月差不多用6位數租用尖沙嘴近千呎辦公室。Eric坦承,希望透過賣樓賺返「應得的收入」,對於係咪想賺快錢,笑言「兩睇啦」。他們表示,近5個月來促成超過10宗交易,報稱收入比往打工時翻倍,佣金收入不願透露,惟三人身體力行,合資9萬元買入一個代理的樓盤單位,價值200萬元。
Ray指,促成交易中,兩組香港中年買家原先只有意各買一伙,惟一同出發到當地視察後,兩組客竟然各多買一伙,營業額由500萬港元增至1,000萬元,由原先賣2伙變成賣4伙。目前,三人之中,只有Ray在港擁有物業,未上車的Alvin,未來希望花600萬元在港買300餘至400方呎物業。Eric就覺得港樓仍然太貴,只望賺到錢盡快成家立室。Ray希望可放低搵錢包袱,到世界各地體驗不同文化。




來源: http://hk.apple.nextmedia.com/financeestate/art/20170206/19919244
測量 轉行 地產 代理
PermaLink: https://articles.zkiz.com/?id=325611


ZKIZ Archives @ 2019