太古廣場：環球金融，地方真係咁有智慧？
1 :
GS(14)@2017-01-26 07:42:52臨近新年個個都唱錢封利是，本來一片喜氣洋洋；但係地方智慧、近年係咁賣外國零售銀行業務嘅滙豐，就好似有啲烏龍咁嘞。先講最近滙豐出咗個電子派利是功能，客戶可以用電話派利是、即係轉賬畀親友。聽落好似好方便咁，不過就畀網民插，話無晒傳統，又話派利是係意頭，唔係齋講錢云云。家姐我反而諗起大陸都好興喺手機派錢，好似微信紅包咁。咁啱近年港大學生會選舉，又有位會長候選人係內地生，佢喺選舉投票之前用微信大派紅包，畀人話有賄選之嫌。不過滙豐出電子利是，可能都係想分薄返員工嘅負擔。皆因全民攞銀紙封利是，作為發鈔銀行之一嘅滙豐就甩晒轆。家姐有個朋友係滙豐客仔，仲要係收到客戶經理電話，主動問佢要唔要新鈔封利是嗰隻。本來以為可以預約，又唔使排一大餐，好似好正咁啦，點知原來係惡夢嘅開始。一朝早家姐見放假得閒，就去陪呢位下個月就放產假嘅朋友去分行攞新鈔啦。朋友係個潮人，手袋仔又細，滙豐就咁用個紅噹噹嘅紙袋，入住幾萬蚊嘅銀紙，畀朋友用手拎走，出咗門口真係提心吊膽佢會畀人搶錢。咁都未算最驚，最驚係同朋友食完飯，送埋佢過海返工，佢竟然收到今朝攞新鈔間分行電話，話teller頭先入slip個銀碼寫少咗二千蚊，叫朋友喺分行收工前要過海去返分行，再簽過張slip，如果唔係個teller就會俾人炒。
Teller做錯嘢，竟然指定一個大肚婆過海去cover個分行經理同teller嘅失誤。而且家姐我有理由相信，如果掉返轉，係朋友攞少咗二千蚊，滙豐CS最多喺電話話「銀紙出門，恕不負責」，完。（最後朋友抱住惻隱之心，真係返咗去分行簽名，唉）順帶一提，滙豐今年又加咗服務收費；與此同時，普通客戶可以用嘅理財中心又越嚟越少。家姐我有個日本朋友喺位於中環同金鐘交界嘅和記大廈一間律師樓返工，以前都可以喺樓下間滙豐交吓錢咁，?家間分行「upgrade」咗，唔做佢生意喇。身為外國人想交個錢，唔該行遠啲去統一中心或者去總行啦。近年大企業成日畀人聲討，好似「大企業就是罪」咁，相信員工同管理層唔多唔少都有啲委屈。其實大企業喺收費越嚟越貴嘅同時，同大眾客戶嘅距離好似越嚟越遠，服務質素有時又唔達標嘅情況出現。客戶同巿民有怨氣，怪得邊個？【家姐教路】最近好多老人家去銀行攞完銀紙畀人搶錢嘅新聞，作為孝順仔女最好陪老人家去攞錢。至於電子利是，先撇開傳統唔講，係就係環保，但係即刻上e-banking就check到派咗幾多利是，好尷尬啫……關家姐
http://fb.com/kwangajei
來源:
http://hk.apple.nextmedia.com/financeestate/art/20170124/19906647