今個月買賣:
6 MAR 賣出亞倫4,000股@$2.26
14 MAR 買入利亞2,000股@$3.96
26 MAR 賣出龍記2,000股@$3.81
27 MAR 賣出聯亞3,000股@$5.15
近日大陸民企陸續出事, 加上新地聯席主席郭氏兄弟被廉署拘捕, 兩大事件皆會影響投資者信心. 其實某部份大陸股有內在問題並唔係新鮮事, 普遍投資者應該都早有心理準備. 就算係小型基金, 押重注訓身買中爆煲股既情況應該唔會出現. 可能最終博士蛙, 大慶, 澳優, 寶姿, 歲寶等等真係復牌無望, 但由於市場上仍然有過千間公司, 只要繼續有得炒, 過得一段日子, 停牌股是死是活可能已經無乜人會再關心, 所以個別民企爆煲所對股市造成既打擊應該有限.
郭姓兄弟被拘留一事相對上會係黎得更加震撼, 而且打擊力度亦可能會更持久. 始終新地係大藍籌, 很難想像若然兩人最終罪成(雖然最起碼都要等一年半載後), 香港整體企業形象會出現幾大變化. 加上傳媒落力渲染, 刻意將此事同特首選戰拉上關係, 更令人猜疑類似黑幕日後會否愈掀愈多, 火燒連環船.
壞消息很多, 雖然未去到世界末日既地步, 但仍然值得適度提高警覺. 尤其係今年以來股市反彈甚多, 投資者持盈避險, 人性使然. 以此作為藍本去審視自己倉位, 基本上都應該係以增持現金為主. 遇到有疑點既股份, 就要加倍留神. 例如龍記(255)來年能拗腰翻身既機會應較細, 值得先沽為敬; 聯亞減派末期息, 理論上問題不大, 但既然略有戒心, 減持部份亦不為過. 反正組合處相對高位, 操作上倒不如退一步先打好防守. 雖然難以準確預測未來股市如何發展, 但起碼要向自己保證萬一稍後巨浪再來, 亦唔會重蹈去年覆轍, 綁住手腳任人魚肉.