ZKIZ Archives


唔使樓神 陳啟宗好抽得

2013-11-07  NM
 
 

 

恆隆地產(101)主席陳啟宗(Ronnie)講嘢一向招積。早前賣陳年貨尾盤浪澄灣,一招先到先得,成功引來一班南亞裔排隊黨,免費為樓盤宣傳。埋門改番做抽籤,一樣賣個滿堂紅。本週一,小宗見到成件事嘅「幕後黑手」Ronnie,梗係要向呢位新「樓神」請教嚇。點知佢笑騎騎,使出一招過橋抽板:「銷情幾好,嗰啲有問題嘅嘢(南亞裔排隊黨),最好少啲啦。」

以為佢收斂咗,咁又錯喎。近期人人話樓價必跌,Ronnie就話連下星期賣樓賣成點都唔知,出年更加唔敢講,「實在佩服現時部分基金經理夠膽為未來樓價作預測,講到天花龍鳳,咪滿街眼鏡玻璃囉。」譁,班芬佬真係躺著也中槍。佢仲將自己嘅七年貨尾盤,同純官嘅樓花盤The Austin拉埋嚟講,話人哋係豪宅,佢個浪澄灣都係豪宅,只係相差一個地鐵站,但有海景咁話。水,真係可以無限抽囉。話時話,恆隆負責賣樓嘅吳士元走咗三年,低一級嘅司徒永康今年四月又走埋,搞到近期賣樓都只係得大公關關則輝出嚟見人。Ronnie早啲請番個樓神,咪唔使親自出馬,左抽右抽囉。不過,Ronnie一向出名「難啃」,唔知邊個夠膽接受挑戰呢,又。

Give me a break中環靚湯速遞大測試

秋風起,天氣乾燥,最好飲碗老火湯滋潤嚇,尤其係日日對住股票機,鬼咁躁嘅金融佬。中環食晏,人多,趕時間,好在不少湯水公司都有送上門服務。小宗搵埋金利豐研究部執行董事黃德幾(Dickie),測試嚇中上環區三間熱門外賣湯水店嘅水準。講好中午十二點送到,結果無間準時。最先到嘅「中國湯」,都已遲到廿分鐘。用密封膠袋載住嘅花旗參老黃瓜馬蹄響螺煲豬湯,盛惠五十蚊,倒出來有兩碗分量。無湯渣,味道夠濃、足料,但略嫌花旗參味太搶,最致命嘅係太油, Dickie飲到皺晒眉:「好似未隔過油咁,我見到都唔想飲,莫講話啲 OL。」
五分鐘後,「靚湯工房」送到。瑤柱螺片木瓜雪耳無花果南北杏蘋果豬


Next Page
ZKIZ Archives @ 2019