誣告朴有天性侵女子被要求判監2年
1 :
GS(14)@2016-12-24 10:55:40韓國男團JYJ成員朴有天今年6月先後被4名女性控告其性侵，經調查後警方證實朴有天冇嫌疑，而朴有天就起訴首名報案人A小姐、其男友及其有黑道背景嘅表哥，以誣告、恐嚇未遂等罪名起訴三人。事隔半年，案件即將進入最後審訊階段，據韓媒報道指，前日嘅審訊以非公開形式進行咗2個半小時，3名被告於追加陳述時向裁判部表示感到委屈，A小姐表示對過去的行為感到後悔，希望可以獲得輕判。而警方分別要求判處A小姐2年有期徙刑、其男友1年6個月有期徙刑及有黑道背景嘅表哥3年6個月有期徙刑，最終審核結果將於下月17號宣判。不過審訊結果一出，立即引起粉絲嘅不滿，紛紛留言指刑期太短：「毀人前途居然只判2年？真係好唔公平」、「清者自清！」、「試圖不勞而獲，試圖敲詐勒索，試圖以毀一個人而達到目的嘅人，總歸要為自己嘅行為埋單。」等。另外，朴有天嘅隊友金在中將於下周五(30號)退伍，其所屬嘅C-jes事務社於官方Instagram上載咗短片為佢倒數，粉絲都相當期待；至於另一隊友金俊秀近日就忙於音樂劇《死亡筆記》嘅綵排，攰到喺長櫈都瞓得着。
來源:
http://hk.apple.nextmedia.com/entertainment/art/20161224/19875757