2012-3-3 AD
上星期日在馬場碰到退休警界人士 C，佢每個星期日到沙田馬會游水做桑拿，之後輕輕鬆鬆小注怡情，賭番幾場馬，退休生活可說寫意，大慨唯一唔爽之事就係退休前有公務員宿舍住，家住渣甸山，幾十年冇買樓，退休後唯有將就啲，遷居到新界，與太太兩人住番層細好多嘅樓。現在曾特首之情況其實與佢差不多，只是曾特首官階雖然最高，但過往二十幾年為咗避嫌，唔敢向地產商買一手新樓，結果豪宅樓價升到連佢都未必買得起，二手樓又搵唔啱心水，六月三十號之後唯有租住深圳豪宅，年租八十萬元人民幣，但本文截稿前宣佈退租，唔似得將來嘅特首姓梁嘅可以滿任後住在山頂大屋，姓唐嘅可以返回九龍塘。
曾特首於六月三十日晚離開禮賓府，新人在七月一日入住，大屋搬細屋，都幾麻煩，特首辦人員聽講已開始為籌備特首搬屋而做到幾緊張，六月三十日清場，你估唔使一大番預備工夫咩，到時搬去邊呢？
退休 C問左丁山有冇貼士，算佢好彩，問得遲，因為左丁山頭幾場啲心水馬全部輸晒，如果一早講俾佢聽，盞累人，退休 C話既然如此，就告訴你一個故事。
話說佢在唐英年九龍城住宅僭建事件見報之後，坐火車出九龍，有咁啱在九龍塘站俾一位有線電視新聞記者截住訪問，問佢：「唐英年應唔應該退選？」退休 C答：「退唔退選要睇好多方面，唔可以單單因為僭建就叫唐英年退選。」一問一答就係好簡單。晚上退休 C在家看有線新聞台，見到記者訪問兩個行人，都話唐英年應該退選，但訪問佢自己嘅鏡頭，就完全冇出現，退休 C問左丁山：「傳媒唔係要中立平衡嘅咩？點解反唐嘅訪問播得出，我話要考慮埋其他因素就扣起唔播？」佢問我，我問邊個？唔識答，退休 C話下次再有幸碰到有線電視記者嘅話，就會請佢地問吓吳光正點解提名唐英年！咦，係噃，練乙錚嘅唐梁板塊論，甚有市場，從唐梁提名人士之中，漸見端倪，傳統主流大財團包括吳光正（九倉會德豐）等全部挺唐，練乙錚筆下之二線人士，如恒隆、瑞安、嘉里（郭鶴年家族）、國泰君安等就挺梁，實在壁壘分明，啲電視台老闆全是富豪，全是挺唐派。
（左丁山）