ZKIZ Archives


【1111】真獨不可恥 銀龍獨食更安心

1 : GS(14)@2016-11-12 05:55:38

大學講師Nick覺得令人安心獨食的地方,即使貴少少,「同路人」都不介意付。



周一晚上7點半,走入天水圍銀龍粉麵茶餐廳的女記者可說是異類。放眼看,一支公,通處坐。細枱,一張一個;大枱,六座三個。



睇餐牌,我驚呆了5秒,在銀包乾過我塊面的日子,看到接近80元的晚餐,飲嘢仲要加錢,我覺得塊面嗰刻潤咗。我還在盤算,王駿(Nick)從容點了一客霸王雞飯。菜上了,沒有驚世的香味,雞肉腍但不滑,淡而無味,雞下的豉油明顯上枱前才與雞碰面;飯很硬,我終於找到比我銀包乾的東西。收咁貴,你交出咁嘅貨色?仲要咁多人來食,我睇唔透。Nick似乎不覺有何不妥,然後他給我看了一段文:「今晚晚餐盛惠75蚊,75蚊,可以去酒樓外賣三盒切雞飯,但係我選擇去銀龍叫咗一碟霸王雞飯,銀龍既無service,又無美女,有嘅就係貴人一倍有多嘅食物,點解仲有咁多麻甩佬獨自搭枱食飯?」


自願被劏同路人零尷尬


乜事呀,用潮文大我呀?講啦你,點解呀?點解呀?「因為呢度瀰漫着一股孤獨寂寞嘅氣息。」「銀龍冇一對對嘅愛人,冇齊整嘅一家四口,就好似有盤尼西林嘅地方,周圍就好難有細菌滋生,而呢度嘅盤尼西林,就係高昂嘅定價。獨獨嘅你,之所以會畀多份錢,為嘅就係買一處可以安心獨食嘅空間。」世事都被呢位冇乜味覺的兄台看透了。
Nick在香港科技大學任教語文,是一級講師,有女友,但同對方住處相隔好遠,long D咁款,加上工作唔定時,所以成日一個人食飯。我笑:「偽毒可恥呀,扮乜啫你!」佢話:「偽毒係扮自己一個人,有得揀。我係真『獨』,冇得揀,逼住要自己一個人。」一支公去銀龍自願被劏的人有太多個,觀察家上身的Nick覺得因為嗰度大部份都是獨自覓食的同路人,零尷尬,冇歧視。


有女友講師:需要獨處


曾在旺角工作的他在人來人往、插針唔入的旺角,一樣找到「一人前」好地方。他帶我到黑布街的Knockbox,他熟練地選了cafe吧枱最入的一個位,遠離門口,也避免坐方形枱可能要搭枱嘅問題。「有時你會因為alone,睇多好多嘢,例如原來人哋係咁樣沖咖啡喎;但你獨處時覺得lonely係因為你覺得只得自己一個,你完全睇唔到身邊有其他事。」跟自己相處都係一門學問,點樣化寂寞為思考空間,的確要時間適應。佢有時仲會去酒樓外買飯盒,再行去麥花臣球場的看台上面食。「我覺得冇人會留意有乜人坐响嗰度瞓响嗰度,睇乜報紙,從來冇熟人見到我坐响上面一個人食飯。」嗰度一樣唔會出現情侶。「我估如果真係帶女朋友去,嗰對情侶還維繫到,就一定係真愛。」一個人,可以有七個樣,對住唔同人,就換個面具。「幾時可以做自己呢?自己食飯嗰刻,就真係可以做自己啦。一個人,個世界真的簡單好多。」偶然獨處,就係為咗畀自己唞下,面面俱圓唔是唔好,偶然畀啲稜角出番來,都唔是壞事。記者:葉青霞攝影:劉永發


很多麻甩佬在收費高昂的銀龍搭枱食飯的現象,令Nick覺得好有趣。

Nick認為坐bar枱,大家都只向前望,不用理周圍的人,看眼前的咖啡機就好。

由於麥花臣球場正在維修,Nick只好在旁邊公園獨食飯盒。


平日麥花臣球場看台上有好多阿叔分散而坐,人好多但話好少,好適合獨食。



來源: http://hk.apple.nextmedia.com/su ... t/20161112/19830857
1111 真獨 獨不 可恥 銀龍 獨食 安心
PermaLink: https://articles.zkiz.com/?id=315255

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019