樂香園：大酒店大平賣？
1 :
GS(14)@2016-10-26 07:58:07香港實在是處很特別地方，「不能正常如廁」劏房可以大賣，但與此同時，呎價接近8萬元、每個單位作價逾3億元天價豪宅，同樣可以大賣，到底是港人太窮，還是港人太有錢？違和得來又好像有其道理。說回正題，家在南區的基金友人同樣有此想法，跟密西比頻說樓市「好怪」。友人說：「啲樓黐晒線，豆潤咁細嘅劏房單位可以賣到4球，冇大型會所劏房又可以收每呎8蚊嘅管理費，完全同需求脫節……大佬呀，冇錢先住劏房啫，但既然冇錢，又點有咁多首期買貴樓？邏輯講唔通，枉梁特仲不停咁話改變咗大家樓價只升唔跌嘅心理預期，信佢賣咗樓之後又冇上返車啲人就慘喇。」他續說：「冇景、冇校網、冇大會所、冇靚設計劏房賣咁貴，搞到豪宅好似好抵，雖則我當然買唔起啦……講開又講，豪宅係咁升，老牌上市公司大酒店（045）都有個淺水灣豪宅影灣園，淨計豪宅部份有100萬平方呎，若果用Mount Nicolson均價六折計，市價都超過400億，但大酒店市值居然只得130億，係咪又好怪？大酒店大平賣？」密西比
來源:
http://hk.apple.nextmedia.com/financeestate/art/20161026/19812411