【I phone U in a 2G way】用Nokia還可以生存嗎？
1 :
GS(14)@2016-09-18 10:52:41Stanley用緊嘅電話係Nokia220。
當阿公都用緊WhatsApp同我keep in touch，喺身邊搵個仲用緊舊式手機嘅朋友可能係mission impossible，偏偏又畀我遇上一個，「我都有用過iPhone㗎，啲apps幾方便，只係幾年前壞咗粒掣，拎去整又話冇得整要換新，我個人念舊，唔多鍾意呢種消費模式，用番Nokia算。」Stanley唔係七老八十亦唔係深山野人，33歲從事海洋生物研究嘅佢仲要周圍飛，「試過喺斐濟想買張電話卡，佢一睇我部電話就話不如你去第二度搵，我賣呢張有包數據的。」呢位80後拎住部Nokia220，連去到資源冇咁發達嘅地方都被嫌棄。
根據WhatsApp統計數字，全球大約有10億個用戶，WhatsApp群組亦有10億個，系統每日處理420億條訊息，每個用戶平均每星期用咗大約200分鐘喺WhatsApp上面，但我估香港用戶應該唔只呢個數字囉，「我見依家嘅溝通方法真係千變萬化，WeChat、LINE、facebook、WhatsApp好多唔同嘅平台，大家好多方法去溝通，但溝通嘅內容反而變得單調，例如有時好簡單放一個公仔（emoji）就算。」真係好想知420億條WhatsApp訊息之中有幾多條係只得一個emoji或兩三個字嘅回覆，「朋友約食飯都冇話投訴嘅，但有時都會話send SMS要錢，所以見佢哋會喺一個message內有好多唔同資訊，將所有想講嘅嘢一次過講晒出嚟，唔係仲充實咩。」
Stanley：「我哋以前由好大部嘅大哥大話演化到越嚟越細部嘅電話，但smartphone之後又開始越嚟越大部，仲要加埋個尿袋，完全袋唔到落褲袋。」
我哋去到地鐵港島新線，Stanley手上嘅2G電話完全收唔到。
Stanley平時會幫襯街坊小店順便問路。
send掣易撳，又唔使錢，每日海量嘅訊息同資訊，寫嗰個唔用心，睇嗰個亦唔上心，溝通多咗，其實係越溝越淡。話雖如此，Stanley其實冇抗拒過iPhone，「以前一開apps就可以check到潮汐、天氣都幾方便㗎，咁每一項發明都要睇用嗰個點用，例如發明支槍都唔一定用嚟殺人同打劫。」冇用iPhone原來都有好處，「依家少咗時間撳電話，好處係唔會成日被電話佔據，唔會成日聽歌或者睇片，多咗時間思考、睇風景，或者睇媖眾生相，例如搭地鐵都會目及媖前面嗰個睇緊乜，睇媖人捉小精靈都幾得意，不過對我嚟講，潛水搵魚唔係仲過癮咩？」除咗聽歌、睇片、社交，搵路可能係smartphone另一個用得最多嘅功能，「我好多時早一日睇定要去嘅location，print定地圖，知道大約位置，知道坐乜車去到邊個站就跟地圖搵，搵唔到就問人。」香港交通方便，鐵路覆蓋咗城市大部份地方，知道邊個站落車就唔會太難搵，但外國呢，「有時跟地圖搵可能會行遠咗，但行遠咗咪睇多啲嘢囉，冇乜所謂。」當然前提係有時間啦。嗰日Stanley喺海洋公園開完會，我哋即時畀咗個地址佢要佢用自己嘅方法去，搵得到就請佢飲杯啤酒，「好吖，路在口邊，實去到嘅，唔限時㗎嘛。」記者：曾冠輝攝影：伍慶泉
來源:
http://hk.apple.nextmedia.com/su ... t/20160918/19773694