ZKIZ Archives


張秀賢走出抑鬱低谷:搵番希望

1 : GS(14)@2016-09-01 06:15:47

【本報訊】學民思潮前發言人、中大學生會前會長張秀賢,3年前患上嚴重抑鬱及焦慮,曾因情緒爆煲萌生自殺念頭,現已康復走出低谷。他促政府由教育制度做起,改變社會功利、冷漠氣氛。他批評政府忽視學生聲音,「勇敢地講現實有乜問題」才有望治本。


稱教局措施「冇乜用」


張秀賢3年前擔任學民發言人時,因自我要求高,加上學業、朋友離世等因素下出現情緒困擾,「一時會覺得好鬱悶,試過連床都落唔到,但一時狀態、情緒又好高漲,連續廿幾個鐘唔瞓」。情況持續近兩個月,張憶述爆煲一夜更打算「死咗佢算」,「記得喺半夜嚟,我爆喊,覺得唞唔到氣,好辛苦,真係崩潰到想死」,最終靠理智撐過,「講都唔信,當時諗嘅係『邊種自殺方式唔會影響到人』,諗諗吓發現冇,於是就打消咗念頭」,最後張到精神科求診。張分享過來人抵抗情緒病的經驗,「人人唔同,我自己後來學識咗時間管理,同埋了解自己極限,即係知自己就嚟爆,就真係去唞」。尋死前更應想清楚,「始終最明你嘅係你自己,諗清楚會唔會影響到人,自己仲有乜未做同好想做;就算係好虛無嘅都冇所謂,要搵番個希望,搵番自己繼續生存嘅動力」。張直言教育局宣揚正能量、提高抗壓力等措施「冇乜用」,未能針對包括學業壓力、前景憂慮等問題;張現就讀中大政政系4年級,慨嘆校園氣氛亦日趨功利,「老師要兼顧行政、教學、研究,冇時間接觸學生;學生就要追GPA(成績)換嚟實習、出國交流機會,成個校園嘅人際關係同氣氛都變得好冷漠」。■記者葉偉東




來源: http://hk.apple.nextmedia.com/news/art/20160901/19756404
PermaLink: https://articles.zkiz.com/?id=306958

Next Page

ZKIZ Archives @ 2019