成龍喺澳洲被捕獲急戴頭盔：每天都看中國比賽
1 :
GS(14)@2016-08-13 14:50:20大陸網民真係難捉摸...仲記得上個月南海仲裁案，好多藝人都貼咗張染紅地圖防身，閘住班愛國網民避免洗版。但係出晒名愛國嘅成龍揀咗貼同范冰冰嘅電影宣傳相，結果俾人怒轟佢係「跳樑小丑」。最近巴西奧運又再揭起一輪「愛國熱」，尤其係澳洲泳手賀頓（Mack Horton）嘲諷中國泳手孫楊「食禁藥」鬧劇，令到班玻璃心網民去到賀頓facebook同Instagram洗版，又話要擺買澳洲奶粉云云，《環球時報》仲話自己係「上帝」，唔明點解澳洲咁大膽得罪佢哋。今年已經62歲嘅成龍，上個月底為咗新戲《機器之血》去到澳洲悉尼取景，仲同幾個演員喺地標合照，驚死人唔知佢喺澳洲咁。估唔到一個禮拜之後轉晒風向，因為大陸網民抵制澳洲，成龍冇再講自己身處何方，直至昨日有傳媒喺悉尼歌劇院發現成龍拍戲，仲放咗上網，成龍即馬上戴頭盔，更新微博，話本來拍攝工作係要保密，估唔到會俾人發現……重點仲係，成龍大讚中國奧運選手：「最近每天一收工回来，就是守着電視看中國奧運選手的比赛......而且我最想說的是，新一代的運動員們心能都很好，特别可愛，這才是競技體育該有的樣子！」不過咁，悉尼同里約熱內盧，時差有成13個鐘喎......大陸網民見成龍賣口乖，已經唔記得咗南海發生咩事，好多人留言叫成龍留喺澳洲唔好走，等賀頓一返澳洲就嚟次兩雄相會，切磋比武：「大哥加油！順便幫我們打一頓霍頓（賀頓）吧。」
來源:
http://hk.apple.nextmedia.com/entertainment/art/20160812/19733182