【閃爆fb】忽然車女友飛台灣 男網民：好大壓力呀！
1 :
GS(14)@2016-06-06 02:55:07放天燈上面的願望，祝你哋成功啦！
好曬呀好曬呀…！6月1日的facebook，傳出超甜閃片一則。網民Ka Tsun Tsui以「兩周年的大驚喜」為題放閃，「偷偷地（哋）上網買機票再喺佢返工既時候返屋企汁（執）埋佢既（嘅）嘢，再上網整埋入台証（證）……」接女友放工，開客貨車的Ka Tsun以「要去機場接客，順便食飯」為名，車咗女友去機場，落車時女友先見到執好晒的行李篋，仲有護照與去台灣的機票。影片中女友嚇到碌大眼，係咁問「真係o架？係咪真o架？」仲喊咗出嚟。網民同男友都睇得好過癮，即時瘋傳，一日就有60萬點擊同2萬個like！不過全片最尾一句：「你唔係輸咗七千蚊咩！」成為全民焦點。原來男主角本來就常給女友驚喜，不過玩咁大都係臨時主意，他接受記訪問時說：「主要係女友想去旅行，之前冇乜特別日子，所以一路得個講字。加上台灣夜市，女仔購物地方多，所以希望一試。」
買波輸七千蚊 「兄弟借錢救命」
原來返part time的女友Kimmy早就請了6月1至3號三天假，才告訴Ka Tsun一起過兩周年，Ka Tsun就說要參加朋友婚禮，叫Kimmy請多一天星期六，其實嚇佢一嚇去旅行！兩個都周時諗嘢逗大家開心。行李呢，衫褲護墊等佢已經執好，再跟女友說放工去影靚相去玩，女友晨早執好全套化妝袋跟身返工。至於成為大家關注焦點的七千元，真係買波輸咗畀馬會嘅，女友知佢買嗰場，仲曾經叫佢唔好買，「到我一意孤行買咗之後屋企睇直播輸咗，佢嗰幾日都陪我悶悶不樂。」但係佢覺得：「時間過咗去就冇得返轉頭，錢冇咗可以再搵過。我都係即刻搵個兄弟義不容辭借錢救命，返到香港要跑山還番畀佢。」識睇梗係睇留言，網友們反應大抵分成兩派，女的葡萄：「×××（應該係tag男友），輸咗七千蚊都有得去旅行啊！」男的感受到無窮壓力：「喂點搞呀！你咁樣我哋好大壓力喎！」Ka Tsun就話唔怕第日再諗驚喜有壓力，「女友好知足，陪佢行吓旺中買吓衫已經好開心。香港太多負能量了！」但其實驚喜嘅嘢，最緊要有心思，連逗大家開心都要計算，排level，怪不得處處都是壓力了。資料來源：Ka Tsun Tsui facebook記者：陳慧敏
來源:
http://hk.apple.nextmedia.com/su ... t/20160603/19638803