ZKIZ Archives


亞瑪遜掃低HMV 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130121/18140985
中環有間HMV,以前在中建大廈M樓,與置地廣場連接,非常方便,係著名股票分析師F嘅「愛店」,每日中午時分,大量在IFC、遮打行工作嘅人士行經中建大廈去蘭桂坊,威靈頓街一帶嘅餐廳食飯,人人都會經過HMV,故此分析師F最鍾意順便入去HMV一行,有合意嘅CD就買,唔合意就瀏覽啲新影碟,當係消遣時間。後來因為租金昂貴,HMV一度在中環失蹤,去年初又在娛樂行重現,不過地點偏咗一啲,冇咁方便咯,但點都好過冇吖。此日突聞英國HMV母公司宣佈尋求破產保護,香港分公司命運難卜,以香港租金咁貴,母公司既然破產,子公司大概難以保存咯。
有92年歷史嘅HMV,三四代英國人嘅集體回憶,到咗21世紀,卒之難敵網上在線下載,亞瑪遜網站令人又愛又恨,愛者,買書購物實在方便到極,恨者,亞瑪遜在IT奇才貝索斯領導之下,已成為一隻餵不飽嘅巨型老虎,行將吞噬所有與佢競爭嘅大街店舖。HMV之所以失敗,就因為(一)分店多,舖租與店員薪水成為大開支,難與亞瑪遜競爭;(二)上網下載音樂,容易之至,英國大歌星大衞寶兒最近推出新作,全部在iTunes銷售,唔出CD,令HMV冇CD賣。IFPI數字顯示,2011年嘅CD銷量只得九千二百一十萬隻,比2007年嘅一億四千五百八十萬隻,足足少咗37%,與此同時,同期嘅數碼音樂銷售就由八千四百二十萬個單位增加至二億零二百八十萬,增幅係2.4倍,咁嘅銷售趨勢,梗係大大有利亞瑪遜與iTunes,不利HMV咯。
CNN搵齊啲數字之後,仲發覺網上售物好多時唔駛俾稅,但在HMV買唱片,銷售稅點都走唔甩,用家/消費者係聰明嘅,會揀邊一個銷售點?
HMV係數碼化、互聯網世界嘅犧牲者,經營模式被科技淘汰,以後同樣事件,陸續有嚟,講感情,我地梗係唔捨得HMV呢類店舖,畢竟自小跟父母行街購物,現在帶子女行街購物,見到真實產品,睇得見,摸得到,與售貨員有交流,店員有薪水維持佢嘅家庭生活,但亞瑪遜及同類網站不斷變型之後,大街商店逐漸消失,我地買嘢對著電腦打字,冷冰冰,無感情,非吾所願也!
PermaLink: https://articles.zkiz.com/?id=43366

Next Page

ZKIZ Archives @ 2019