氹阿爺開綠燈黃貫中被勒令封口
1 :
GS(14)@2016-04-15 04:36:222016-04-14 NM
相隔四年再開騷的黃貫中，不再憤怒了！見到老婆朱茵同囡囡黃鶯high爆捧場，更變身暖男做緊張爸爸，「我個女第一次睇騷，你哋唔好嚇親佢！」做完香港，阿Paul接住會到新加坡及台灣再唱，之前因為撐「佔中」，搞到申請一年都攞唔到內地開騷批文，為打動阿爺開綠燈，阿Paul被公司勒令封嘴，希望盡快洗底，有日可以重啟內地騷。囡囡呷醋
Beyond成員互相唔妥，合體再開騷幾乎已經不可能！黃貫中單飛唱，Beyond fans一樣返晒嚟，觀眾企足全晚，情緒高漲。見爹哋被一班姐姐姨姨狂抽水，囡囡黃鶯呷晒醋，完騷後要阿Paul勁氹。「我同佢講，爸爸係你嘅！」全晚唱廿幾首歌，阿Paul唱多說話少，唱到新歌《大英雄》，他有感而發。「每個人心目中都有自己嘅英雄，我都有，邊個就唔講嘞！點先算係英雄？我就唔想做英雄，英雄要壯烈犧牲，要中槍，或者俾人暗殺，我仲有歌酬收，開心都嚟唔切。」
怕節外生枝
Beyond有不少歌曲是宣揚和平民主，而一向敢言的黃貫中，曾經參加遊行，又撐過雨傘運動，不過，自從去年四月簽約新經理人公司，原先計劃由去年十月開始的內地巡唱，申請一年，始終無法攞到批文，阿Paul亦被公司勒令封嘴。「阿Paul依家收斂晒。本來計劃好舊年十月開始做內地巡迴，廣州係第一站，但一路都攞唔到批文。所以公司都勸佢唔好再亂講嘢，無謂節外生枝。」知情者說。
全面封殺
無論以任何方式支持或參與過雨傘運動的藝人，全遭內地封殺，cut騷又cut job，無機會再北上 吸金。
謝安琪被指雨傘運動期間，曾帶物資現身金鐘佔領區，又唱過《雞蛋與羔羊》，謝安琪即被愛港力召集人陳淨心追擊，內地工作全被延期，原定在內地十場巡唱突然取消，Kay無奈表示：「好內疚，有因為咁而喊過！」
張敬軒有傳張敬軒因曾瞓街支持雨傘運動，而被踢出《我是歌手4》，早前陳淨心更在微博呼籲內地同胞抵制張敬軒。
何韻詩雨傘運動期間，走在最前線的何韻詩首先被開刀，內地官方向影視公司下封殺令，14年的廣州草莓音樂節，亦因此攞不到批文要取消。
撰文、攝影、攝錄：娛樂組