ZKIZ Archives


自爆10周年紀念日分手小方灑淚開腔:同Stephy都有喊

1 : GS(14)@2016-03-19 22:15:55

【眼淚直標】■方力申昨日出席活動開腔談分手,其間忍不住流下男兒淚。



方力申(小方)與鄧麗欣(Stephy)相愛10年,由電影《獨家試愛》到《紀念日》一直被視為金童玉女兼打風打唔甩,萬料不到二人前日宣佈分手,昨日小方於「分」訊後首度現身灣仔出席記者會,說到與Stephy分手日正是他們的拍拖10周年,小方更傷感流下男兒淚,他表示決定分開一刻與Stephy都有喊。


方力申前日與拍拖10年的鄧麗欣,透過經理人公司發聯合聲明宣佈分手,之後Stephy於Instagram貼文,以「這是一個非常沉重的決定」來形容分手後心情,小方昨日首度開腔講分手,強調與Stephy分開是二人共同決定,分手原因與結婚問題無關,但承認二人「有問題解決唔到」,其間小方兩度落淚,自爆分手日就在拍拖10周年紀念那天,又表示Stepty有傳短訊給他講不好意思,要他一個人面對。



宣佈一刻手震

昨午3時小方以「協康會健康大使」身份出席於灣仔君悅舉行的「全港廚師精英大匯演」,面對半百傳媒的他,盡力裝作輕鬆,但發言前他先抬頭吸一口大氣,並說:「今日呢個訪問嘅安排係我自己嘅安排,我覺得一啲唔開心嘅事唔想講咁多次。」說罷即時眼紅紅。小方續說:「我同Stephy由地下情開始,直到俾人影到先公開(編按:2012年本報拍到二人於巴黎拍拖),開始咁低調,分開其實都想低調,10年係好長時間,決定宣佈一刻,其實自己攞住電話時隻手係震晒。」提到分手決定,小方再泛淚光:「呢個唔係我一個人嘅決定,係我哋兩個人嘅決定,其實喺套戲(《紀念日》)上映前已經覺得有問題,大家真心好珍惜呢段感情,所以大家有冷靜期,其間我哋不停有出嚟傾偈,過程都係好傷心,大家都有喊。」說到此,小方淚水奪眶而出:「我同Stephy最後一次見係10周年嗰日,大家決定和平分開,所以掹車邊,我哋都算踏入咗10周年,覺得好感恩!」外間有揣測分手是小方不肯娶Stephy所致,小方昨日澄清:「分開係因為有啲問題解決唔到,唔關結唔結婚事。」



【先深呼吸】■一直裝作輕鬆的小方,發言前先抬頭深呼吸。DV圖片

【交代分手】■小方直言與Stephy共同決定分手,二人亦有痛哭。

■今年1月,小方與Stephy宣傳《紀念日》時已醞釀分手。資料圖片



「將來冇人知」

既然與Stephy再見亦是朋友,問二人關係可會有轉機?小方未有一刀切,只說:「將來嘅事冇人知。」至於有網民插他糟塌了女方10年,小方表示不介意,問何時醖釀分手?小方坦言:「電影上映前,但幾時醖釀唔重要,最重要係結果。」小方又表示分手前有3個月冷靜期,問拍《紀念日》是否分手導火線?他承認:「拍之前大家都有擔心過,可能真係有影響。」至於有網友日前影到其座駕載外籍女士,小方指這是在他傷口灑鹽,又說當日該網民拍照其實他就在旁邊,只是對方見不到他。採訪:曹家誠攝影:陳志嵐



■小方回到座位仍在拭淚。

■2012年,本報直擊Stephy孖小方同遊巴黎。資料圖片



來源: http://hk.apple.nextmedia.com/entertainment/art/20160319/19535672
PermaLink: https://articles.zkiz.com/?id=298499

Next Page

ZKIZ Archives @ 2019