操盤手札記：恒地會私有化嗎？
1 :
GS(14)@2016-03-17 14:51:26本周係多事之周。今日英倫銀行和美國聯儲局議息，美息走向於本港時間今日凌晨2時揭盅。明日係內地股指期貨結算日，亦係美國指數期貨、指數期權、股票期貨、股票期權四重結算日。港股向來要睇中、美股市面色，睇嚟明日之後先有方向。昨日兩會閉幕，總理李克強回應對股市睇法，揮手笑答：「你們有信心，我就有信心！」市場有冇信心呢？睇A股反應就唔大囉。滬綜指收市只升6點，報2870點，雖已連升4日，但仍受制2900關。上月喺2638點築雙底後博反彈嘅外資，亦開始有獲利跡象，滬股通連續兩日錄得淨流出，係2月以來首次連日走資。港股亦冇乜力水，收市跌31點，報20257點，投資者觀望議息結果，唔敢輕舉妄動。追縱恒指嘅盈富基金（2800），連續兩日位列成交榜三甲及沽空榜榜首，可能與淡友沽空部署有關。若大市再冇上升動力，自2月下旬開始嘅短期反彈浪可能近尾聲，淡友隨時出擊。本港樓市亦正回調，二手樓頻見劈價求售，但新盤未見大手劈價。前日大摩更發表報告，指宏觀經濟氣氛支持房地產投資，該行削減行業資產淨值折讓目標，認為行業整體吸引；又預計聯儲局今年只會加息一次，本港按揭貸款保持低企。睇歷史數據，加息預期放緩會令地產股跑贏大市。
近日捲入古洞強拆事件嘅恒地（012），再被花旗估有機會私有化或分派其煤氣（003）持股，以便年屆88歲嘅大股東兼主席李兆基分身家。下周一恒地放榜後，若四叔繼續增持至75%，就有機會私有化；不然，則有機會全數派發所持41.51%煤氣股份云云。四叔持恒地72.28%，相對其他藍籌華資地產商如九倉（004）、新地（016）、新世界（017）、信置（083）、恒隆地產（101）、長實（1113），大股東分別持股59.02%、32.83%、43.87%、51.21%、54.30%、30.15%，確係高好多。不過，恒多年來股價走勢及系內持股架構，私有化機會極微。一來，現價46.8元比每股資產淨值72.159元只折讓35%，相對98年、08年兩次低潮折讓六成差好遠。折讓唔大，私有化誘因唔大。二來，需要資金太多。三來，旗艦公司唔會輕言退市。若恒地重組，則有助釋放公司價值。恒地近日發力向上，不妨留意放榜後四叔動向，炒番轉重組。割柑人本欄逢周四刊出
來源:
http://hk.apple.nextmedia.com/financeestate/art/20160317/19532625