2011-12-8 NM
這兩個阿伯，劉定志（Michael）及潘兆麟（Raymond），年屆六十一，一個肥頭胖耳，一個髮線後移，本來在會展做餐廳侍應。半年前，被迫 退休。Michael女兒是物理治療師；Raymond兒子在大機構做電腦主管，其實他們大可享兒女福。 不過，他們認為「唔做嘢好易病」，於是夾錢在大角咀租下逾一百呎的店鋪，改名叫好品味，賣果汁及紅酒。開業一個月，發現收入僅僅維皮。雖屬花甲之年，但拼 勁一如後生仔，不甘心無得賺，故急謀對策，轉型賣禮物籃，主攻地產代理，更四圍去找毛利高的貨源。一個成本一千三百元的禮物籃，可賣二千元。過去了的中秋 節，淨賺六萬元。踏入聖誕月份，他們密密宣傳，打算再下一城。
好品味位處偏僻的大角咀埃華街，店鋪一百六十呎，擺 着兩個放滿水果的雪櫃。不過記者發現該店買果汁人極少，整天只有幾個在附近銀行上班的OL幫襯。剛吃完飯的李小姐，買了杯橙汁，她說：「我咁啱經過，先第 一次嚟幫襯。附近有兩間果汁鋪，一間對正滙豐中心，方便但貴啲，一間喺對面街，唔方便但平。呢度價錢中等，又唔就腳。」Raymond最初認為果汁毛利 高，但沒想過人流這樣稀少，於是他掛上招牌賣咖啡，在門外放置木枱及膠椅，讓人憩息，但仍然挽救不到劣勢。「呢區老人家多，佢哋不嗜飲紅酒、咖啡。」開張 一個月，只有三萬元營業額，僅夠交租及入貨。 Raymond左度右度，「我哋五年前用十一萬喺灣仔頂咗間精品店，俾我老婆睇檔，佢包裝好靚，曾戲言不如入貨做Hamper（禮物籃）。」加 上，Michael與另一名朋友開設了紅酒代理，入貨有門，他們只須想辦法尋找客源及其他貨源。萬事起頭難，但兩人利用自己及身邊人的網絡及長處，解決問 題。過去的中秋節，一個月間收到十二萬元訂單，淨賺六萬元。
宣傳 主攻地產經紀
由於鋪頭地點偏僻，他們決定要走出大 角咀。Michael的太太在中原地產凱旋門分行任經紀，故他「唔熟唔食」：「經紀啲客人好多係炒家、有錢人，過時過節，經紀要送禮俾熟客，一個經紀手上 起碼有十個客啦。」Michael說。他的太太於是先帶頭訂禮物籃，並介紹給同事、行家，一下子傳開來。港置經紀Clement經行家介紹，在中秋時向好 品味訂了三個禮物籃，每個六百元，「呢個價錢喺City'Super只能買到生果籃，但其實喺街市都有得賣。而且只送生果，啲客好容易比較到價錢。 Michael佢哋包裝係用盒，唔係用竹籃，送埋紅酒、德國腸，睇起嚟貴價得多，我啲客買商鋪，閒閒哋幾千萬，我梗係想巴結佢哋，送禮大方啲。」 Clement指他前幾天又幫襯Michael訂了十份聖誕禮物籃。 包裝工作，則交由Raymond的太太負責，曾在Cupcake店及花店打工的她，把一般的絲帶改成繡花餐巾，又寫上心意咭。為求令禮物籃看起來高 貴，Raymond找來泰國朋友，在當地買入人造皮盒和閃石木盒，成本每個八十元。「藤籃好普通，用完就扔，但盒可以當儲物盒。」
食 髓知味，Raymond十一月尾已印定聖誕宣傳單張，放在鋪頭，而Michael的太太已向他們提供了地產代理的電話，開始cold call。本來是電腦盲的他更逐隻字篤鍵盤寄電郵宣傳，「我老花，有時太累會瞌眼瞓。」聖誕檔期宣傳開始至今只有七日，已收到逾百張訂單，其中佔了八成是 經紀，生意額逾六萬元。「我個仔喺國際公司Times做電腦部，佢幫我設計咗個網站，喺十號發布，可網上訂貨，擴大客源。」Raymond滿有計劃。
入 貨 澳洲酒毛利高
要價錢平，又不失禮，Raymond及Michael唯有鍊盡入貨成本。好品味有六種禮物籃，售價由三百元至二千元，平 均毛利約四成，當中最受歡迎的是六百元。禮物籃內主要有一支澳洲酒、意大利餅乾、罐裝鵝肝、朱古力、咖啡等，大部分統一向益中洋行入貨，以取得較多折扣， 「向代理入貨通常一箱箱，入得愈多，入貨價可以再有九折。不過有時要唔夠一箱貨，好似我地要二十六盒意大利餅乾，但一箱只有二十四盒，爭兩盒嘅話要補貨， 去超級市場買仲快，價錢拉上補下，好過責貨。」Raymond謂由於會展常向益中洋行入貨，故他認識益中的銷售部職員逾十年，「細鋪頭多數要即刻找數，一 係買十萬、八萬元貨。但我哋剛開業，入唔到咁多貨，咪打感情牌，同佢哋識咗十幾年，乞乞吓講到三個月數期，搵到錢先找數。」
一 千元以下的禮物籃，選用成本較平，一支約四十元的澳洲紅酒。搞紅酒生意的Michael說會把這些紅酒，貼上自家商標「Triton」，「我舊同事移民過 咗澳洲，識得當地酒莊，入佢哋貨可以加自己公司名，喺超市買唔到，咁啲人咪唔會知隻酒來貨嘅價錢囉。」他們把澳洲紅酒放在鋪頭散賣，每支可賣一百三十八 元，每月可賣出兩箱。一千元以上的禮物籃，則採用法國波爾多紅酒，經明豐酒行入貨，「代理都要賺錢，來貨價已經一百元一支。」禮物籃內的意大利咖啡粉 Pellini，來貨價一千克約一百六十元，Raymond亦把其重新包裝，令人難知成本價，「Pellini本來係咖啡豆，我叫香港代理將佢磨成粉分四 袋，在大陸買入透氣咖啡袋作包裝，又花一蚊印Pellini個招牌貼喺袋上，睇落高級啲，即每袋成本四十多元。」Raymond指代理替其磨粉入袋的費用 全免，但條件是在鋪頭門外掛上Pellini的招牌。 四百元的禮物籃，不會有朱古力、鵝肝等貴價貨，生果數量會相對多，包括澳洲士多啤梨、巨峰提子等。於送貨前一晚的凌晨點半，兩人會親自到油麻地果欄入貨， 「要每間格吓價，你會發現隔籬嗰檔分分鐘每箱平五、六蚊。」他們還提供度身訂做禮物籃，客人可自攜紅酒，Michael收取四成利潤。
淡 季出路 嬰兒賀禮
雖然租金只需八千五百元，但Raymond及Michael也不敢怠慢。他們明白禮物籃生意屬節日性，故已想到做完聖誕 節及新年後，二月份情人節時改以小禮物籃包裝酒杯及朱古力，又構思初生嬰兒賀禮及生日禮物籃。同時，亦購入微波爐，為生意淡季做好準備，「呢邊好多寫字 樓，我哋中午做外賣一份二十五蚊三文治套餐，包埋鮮搾果汁，收入點都夠交租。」 兩人相識四十年，七十年代同在已拆卸的五星級酒店希爾頓任侍應，中途各自在淺水灣酒店、喜來登酒店打滾。Raymond曾一嘗發達滋味，他三十歲時，秘撈 在赤柱賣出口成衣，又炒股買電訊盈科，賺取第一桶金後，在太古城、黃埔花園買入多間物業，三十九歲已半退休，擁有一千五百萬元身家。直至科網爆煲，「八號 仔」由二十多元跌至幾毫子，「嗰陣貪勝不知輸，我都估唔到跌到咁，每月要籌十幾萬先供到樓，係咁借卡數。」十多年前，他以五十歲高齡重出江湖，在 Michael介紹下在會展做餐廳經理，即使退休了，也會繼續努力賺錢，不再投機炒賣。
開業資料（8/2011）
租 金：$25,500 * 裝修：$150,000 入貨：$30,000 雜費：$20,000 總投資：$225,500 *一個月上期，兩個月按金
營業資料（11/2011）
總營業額：$103,000 # 租金：$8,500 入貨：$36,000 雜費：$4,000 人工：$6,800 ^ 盈利：$47,700 #包括聖誕禮物籃訂單$62,560 ^一名兼職，未計老闆人工