麥記搞婚禮去飲人情畀50
1 :
GS(14)@2015-11-23 14:24:28百物騰貴，港人連基本居住問題都未解決得到，有啲窮到連擺酒都負擔不起。不過，最近麥當勞推出結婚派對，擺酒最平只需2,999元，最豪嘅亦只需9,999元，堪稱窮人恩物。老麥生日會一向吸引唔少細路仔要去搞趴地，唔知呢個只可以玩兩粒鐘嘅結婚派對，又會唔會吸引到邊對準新人落訂呢？嘩，話晒人哋列到明有派對司儀，又有中式頭帽，又話有老麥氣球結婚戒指一對，又有所謂幸福薯條相架、愛意玫瑰花氣球又盛咁，乜咁似《食神》所講嘅「濃情化不開嘅豬紅、情比金堅嘅炸豬皮...」咁嘅？好，究竟港人會唔會選擇喺麥記擺酒呢？問下街坊喇喂！葉先生就話：「唔係太好啦！只有魚柳包食。況且，可能有人喺呢度住，喺呢度瞓覺！」陳小姐反而覺得無傷大雅：「我冇所謂，都幾得意吖！」若然有人請你去麥記飲，你又會畀幾多人情呢？呂先生老實不客氣：「50蚊啦！因為我平時食都係呢個價錢嘅！」葉先生比較出手闊綽：「當然畀多啲，新人要喺麥當勞擺酒已經夠慘，唔係畀幾千蚊，都幾百蚊啦！」
來源:
http://hk.apple.nextmedia.com/entertainment/art/20151122/19383133