📖 ZKIZ Archives

競選選委 左丁山

2011-11-12  AD

金融 M失驚無神打電話嚟：問如何競選做選委？左丁山摸不着頭腦：「喂，你從來冇政治興趣，家居山頂，生活優游，做乜事要去競選，好傷神嘅噃，有時間不如陪老公 去打波啦！」金融 M話：「我獻出第一次嘅啦，區議會選舉都有投票，投俾陳淑莊嘅對手，叫做陳乜嘢話？唔記得佢嘅名咯，總之就係唔要俾陳淑莊贏。我依家又想要有資格投票選特 首呀，得唔得？」唔，金融 M係金融界功能組別選民，王冬勝、李民橋都以個人身份參選選委咯，金融 M應該有同樣資格啫，報名冇話唔得嘅，想要選到就難啫。金融 M參選動機係乜，挺邊個疑似候選人呀？
金融 M話：「兩個都有缺點，但我好怕深不可測，並無知心好友，好似百毒不侵嗰位，我想支持一位有血有肉，似你似我嗰位好人一個，易犯錯誤嘅，我無所懼怕嘅 人！」講到呼之欲出，問佢何以有此印象，佢話在金融界打滾多年，認識兩位為人，雖非深交，但佢嘅認知（ perception）係咁樣，唔駛向別人解釋。投票一刻往往係感性嘅，你估個個會揸住算盤入投票站咩！

 

老總 S約左丁山到陸羽與評論員 L飲茶，話題又係離唔開區議會選舉與特首大戰，兩人不約而同咁認為唐營應該有一個突破性競選策略，唔好與 CY爭住落區，爭住講同一話題，要講唔同理念嘅嘢，等啲觀眾有得揀先至得。佢地好奇怪為何 CY未得北京首肯，沒有祝福，仍然堅持不退，但與此同時，評論 L不禁驚嘆：「如此組織性強嘅人物，冒北京不悅之險，係要與亨利死過，究竟為乜？」梁國雄、何俊仁之類就話不怕與北京對着幹啫，三十年來飽受培養嘅土生土 長人物，組織有培育之恩，竟敢不聽組織之言？諗落確係深不可測，高人一名，故此評論 L推測組織並非鐵板一塊，北京或另有高人力撐香港高人。咁就難為晒啲聽雞聲嘅若干愛國選委，最後雞聲未響，胡亂發言，隨時會押錯注，佢地並非金融 M，自己難有喜好㗎！這個世界很複雜，恨不得 2017年快啲來臨，等我地也可以投票選特首。

PermaLink: https://articles.zkiz.com/?id=29157
Next Page
ZKIZ Archives @ 2019