📖 ZKIZ Archives

美國秘密武器 左丁山

2011-11-7  AD

美國嚴重缺乏理工科博士，因美國人本身不願意攻讀，外國學生成為美國一流大學嘅寵兒，中國、印度學生周街都係，所以喬布斯生前與其他矽谷名人嘆息美國授予 中印學生一級科技知識，跟住趕晒啲畢業生走，益晒中印俄等大國。話得說回來，假如下任美國總統與國會真的通過 Staple Act（有理工科博士學位就有綠咭）嘅話，中印博士生咪有好大機會留晒喺美國，唔願返回祖國？如此一來，美國可以不戰而屈人之兵，盡攬天下英才，世界霸主 地位誰與爭鋒？講軟實力喎，美國有令人願意留下不走之魔力，就係最佳軟實力。「胡潤研究院」聯合中國銀行做咗一個調查報告，發現中國千萬富豪之中，一成四 已移民外地，四成六考慮移民，投資移民以美國為首選，香港其次，此發現真是不得了，如果美國真的推出 Staple Act，中國富二代蜂擁去美國讀理工科，中國容乜易人財兩空？唔，美帝國主義者擁有最大殺傷力武器──理工學位送綠咭，中印難以抵禦呀！平民如此，高官變 本加厲，重慶「紅人」薄熙來兒子薄瓜瓜讀書頂呱呱，一早入咗哈羅公校，與英國貴族同聲同氣；胡耀邦之孫在耶魯畢業；萬里之孫女十六歲就到美國入高中。 2011年到美國讀中學嘅中國學生有 6725人，係 2006年嘅一百倍，做留學顧問嘅公司，喺內地一定好發，好發。
中國富豪投資海外，首選美 國（ 42%），次選香港（ 38%），而富豪投資第一件事就係買樓，唔怪得香港啲豪宅咁好銷路。信和賣大埔白石角樓花，就走上大陸做幾場路演，吸引內地富豪，呢啲胡潤調查資料證實香 港樓市可一分為二，細單位低價樓係本港居民買嘅，供應愈來愈多，需求受本地人嘅收入增長幅度所影響，細單位嘅樓價好難大升，甚至會回落；而大單位豪宅供應 幾難大幅度增加（因政府賣地有限呎，限量措施，而新土地供應多以適合細單位為主），偏偏有錢人嘅需求甚大，內地富豪需求不絕，有乜辦法唔將豪宅價格推高！ 低價樓做九成按揭嘅負資產在九月大幅度增加，大家不可不知其中涵義。

PermaLink: https://articles.zkiz.com/?id=29152
Next Page
ZKIZ Archives @ 2019