📖 ZKIZ Archives

電盈 BT高息 左丁山

2011-10-14  AD

股市跌跌升升，教人無所適從，炒股好，炒市也好，總之係睇大勢，睇政策，傳統智慧可暫時放埋一邊，譬如德國法國一聲救銀行，中國匯金一聲買內銀股，歐美亞 股市立即大升，與盈利、數據、市盈率毫無關係。呢日散戶Ａ請吃飯，在福臨門請食山瑞煲及蛇羮，秋風剛起，咁快食補品，唔怕流鼻血？散戶Ａ話：「我去到長 沙、重慶，吃辣仲犀利過湖南人、四川人，從未試過甚麼熱氣，駛乜怕吖！」散戶Ａ好在股市單打獨鬥，前一輪在股票行借貨沽空，賺咗唔少，股市反彈升番上去之 時，佢早已止賺離場或止蝕平倉了，到福臨門食山瑞三蛇，濕濕碎啦。
一批華資經紀要求特區政府禁止沽空，散戶Ａ聽見就唔開胃：「香港規管沽空甚嚴， 但散戶要沽空十分容易，在證券行開個戶口，簽妥文件就得，沽空要逐個價位沽，不能亂咁『隊價』，所有大藍籌及普通活躍股份都可以在證券行借到貨去沽空嘅， 有經驗就唔怕做啦，華資經紀要求禁止，陳家強唔批，我就話陳局長識嘢嘞！」
唔沽空，唔炒作，求穩陣，都係買穩定收息股算嘞，譬如啲地產投資信託（ Reits）。昨日電盈開特別股東大會，一如所料，順利通過分拆電訊業務或統稱為穩定增長業務（ stable growth business），成立 BT（ Business Trust商業信託），分拆後，電盈（八號仔）仍會持有 BT五成以上股權，餘下業務如媒體電視及系統方案等成為八號仔之核心業務。 BT擁有之電訊業務相信要達到估值二百八十六億港元，李澤楷先至肯分拆 BT上市，每年以稅前、折舊攤分前、利息前之現金流（ EBITDA）嚟派息， EBITDA估計會達到二○一二年嘅二十三億五千六百萬元及二○一三年嘅二十五億七千四百萬元，以此推算，派息率（ yield）會分別係 8.2%及 9%，有冇咁筍呀？此乃左丁山膽粗粗計出嚟嘅，如真係有興趣，請向有牌經紀查詢。未來電盈 BT嘅業務相當穩陣，當然唔會係高增長股啦，但如果鍾意買 Reit嘅話，呢隻新品種電盈 BT可以諗吓。左丁山從來冇買過電盈股票，現在有咗 BT，或者貪食息會諗吓，但目前市價及估值未達標，相信要等吓先。

PermaLink: https://articles.zkiz.com/?id=28511
Next Page
ZKIZ Archives @ 2019