📖 ZKIZ Archives

感情缺失 左丁山

2011-10-16  AD

唐英年感情缺失事件，講到異常熱烈，人人有意見，一批老友兼蘋果讀者睇到蘋果日報「蘋論」大駡唐英年不是男人，大感驚奇，以為作者盧峯係明光社蔡志森嘅化身筆名，佢地話：「蘋果日報噃，你估係教會校園報呀？」
左 丁山連日與不同人士傾偈，話題總會提及唐英年，一位馬場朋友講：「有人話此乃黑材料，講畀北京聽嘅，如果係咁就錯到離晒譜，會俾北京領導人斥駡㗎，孫中 山、蔣介石、毛澤東……以至當代，有邊個領袖冇幾個以上女人㗎？」唔，此乃過去式，畢竟現代中國人好假道學者多，總不能公開地出現一個貝盧斯科尼，雖則暗 地裏就多到數唔晒。總括嚟講，左丁山聽到嘅就係，男士多數認為冇嘢，擁唐派男士指此事不值一提，擁梁派嘅就認為係唐之污點，但梁兄哥都講咗佢手上冇黑材料 手榴彈，佢地私底下猛咁唱，但在公開場合就一定不提。
女士又點？嘩，呢日見到一位 50後女士，大駡唐英年，佢話成班閨中密友都唔抵得，認為從政者應道德無瑕，行為要乾淨乾淨好乾淨，否則冇資格做特首。但同日見到呢位女士嘅 80後姪女，自外國畢業嘅，問佢點睇，姪女話：「唓，關我地鬼事咩，唐太肯接受，原諒老公，你地仲有乜好批評，姑媽嗰代太古老嘞，我班同學、朋友，不分男 女，一致認為唐英年嘅私事與我地無關！」

 

後來又問一啲 60後媽咪，佢地話關心仔女讀書、升班搵學校，唔理得邊個有婚外情。問另一位捧唐定捧梁，估唔到有尖銳意見，一位話：「我記住梁振英㗎，我老公九七買樓變 成負資產，我地捱到舊年先至脫苦海，哼，多得佢啦！」唉吔，原來將八萬五後遺症記賬於梁振英身上，抱怨至今；但另一位女士嘅態度就完全唔同：「嘻哈，我就 多謝梁振英呀，唔係佢，我老公點會喺 02年買到層樓呀。」又係記住八萬五，喂，點解唔講吓唐英年？兩位媽咪諗咗一大輪，先至講：「紅酒啦。我地有三位表弟妹在紅酒商、紅酒倉庫做事，佢地話多 謝唐先生推動本港成為紅酒中心，創造職位喎！」

PermaLink: https://articles.zkiz.com/?id=28508
Next Page
ZKIZ Archives @ 2019