沙膽虹手記：請不要忘本 沙膽虹
1 :
GS(14)@2013-04-22 22:59:27http://www.sharpdaily.hk/supplem ... %E5%BF%98%E6%9C%AC/
香港國際貨櫃碼頭工人罷工逾三週，李嘉誠一直禮貌地表示一句話都唔會講，和黃霍大班上週六終於開腔，可能他是壓抑了多周，所以一開口就夾著脷，冇句啱聽。
有一成人罷工表達對薪酬和工作環境不滿意，要求改善，就等於其餘九成都很happy？霍大班豈非犯了教育局局長吳克儉的同樣冇邏輯低能錯誤，話只有九萬多師生家長遊行反國教，其他絕大多數冇遊行的都支持國教？
霍大班又話：現在二十一世紀，叫工人做二十四小時，都要工人自己自願才可以；又話和黃全球有270個碼頭，香港碼頭和黃佔股權最少，只27.6%，香港碼頭對和黃盈利貢獻只1%，言下之意是工人唔like就唔好做，香港貨櫃碼頭對和黃濕濕碎。霍大班這番言論，再配以在電視上見到佢猙獰的表情，簡直得人驚！
難怪即使百佳食物或價格被投訴，或是長實樓被指五樓原來是一樓，長和系都一於少理，皆因管理層認為，投訴只是零星個案，沒投訴的絕大部份好happy；而且現在是二十一世紀，又冇人揸住支槍指住你要買長實樓和幫襯百佳！
當然，和黃唔係揸住支槍逼工人做二十四小時，但霍大班唔使咁寸啩？即使你對工人沒同理心，兼認為香港貨櫃碼頭生意非大茶飯，請不要忘記，李嘉誠是香港發跡的，香港國際貨櫃碼頭一直是和黃當大股東，數十年來對和黃盈利貢獻很大，只是近年才不斷減持，所套現金亦支持著和黃在歐洲的龐大電訊投資！霍大班，請不要忘本！
沙膽虹