|
||||||
|
內地肉製品生產商雨潤 （1068）新聞多多。上個禮拜一，失驚無神發盈警，話第三季利潤下跌，第四季亦唔好得去邊。消息一出，股價即時插水三成，收報7.51元，創近三年新 低。 點解話佢失驚無神？八月公布中期業績前，雨潤先至發盈喜，指受惠於生豬價格上升，營業額及核心淨利潤都錄得明顯增幅，半年營業額164.56億元，按年增 長89.3%，而利潤多賺23%至16.09億元。點知三個月唔到，就發盈警啦，除咗賴俾傳媒「唱衰」，更指生豬價大幅上漲，打擊利潤。同一個理由，三個 月前製造盈喜三個月後則觸發盈警，生豬價格莫非萬能？港交所記錄顯示，雨潤三名執行董事原先各自持有250萬舊股，發盈警之先，佢哋唔聲唔聲沽清手貨，平 均價超過17元。呢批貨之期權行使價為7.46元，即每股淨袋十皮，故此佢哋每人骨水超過兩千萬矣。近排有二十間公司發盈警，學得雨潤啲執董咁沙膽者，只 有中國無線執董李斌一人，但亦只係骨水五百幾萬元而已，邊有呢班人咁大喉腩o架！ 入董事長房鬧我 友報蔡東豪佔領區早前講善伯軼事，恒生舊臣睇過，如骨鯁之在喉，話有所補充。補充乜？佢話善伯有否同伙記講，老婆鬧得，但伙記唔鬧得，有待香港銀行史專家 考證。佢自己清楚記得，善伯同伙記講，發脾氣鬧人，就咁鬧佢啦，唔好鬧其他人。何也？善伯話，凡人嘅心情皆有起伏，喺外邊或者屋企有嘢唔開心，返工黑口黑 面，甚至搵下屬以至客人出氣，人之常情，可以理解。遇上咁嘅情形，諸位萬勿鬧下屬，更千祈唔好鬧人客；入嚟董事長房鬧我，鬧完我，你就會舒服晒o架啦。當 今之勢，有幾多老細會識得善伯呢個鬧董事長嘅道理呢？ 本週圖片永無止境工作清單 宜家上年喺上海開咗個測試及培訓中心，啲員工一星期返足六日，每日八粒鐘，但佢哋話宜家嘅工作環境及氣氛好吸引，人工反而其次。中心貼出「永無止境」之工 作清單。工作永無止境，係咁都可以令員工做得開心。宜家成功，道理即在其中？ 金牙大狀講嘢阿爺個契女？ 外傭居港權有判決，民建聯食住上，發動千人上街抗議其事。做過保安局局長之葉劉食得唔好嘥，叫政府去北京釋法。釋法一詞理應為中性行為，然而按葉劉之口 氣，釋法即等同叫阿爺推翻高院林官文瀚嘅判決，咁搞法，今後使鬼喺特區審案乎？搵阿爺釋法算啦。講到尾，高院作之判決，係呢單官司嘅第一站而已，睇嚟仲有 排打。事實上政府已經話咗會上訴，即使上訴庭輸埋，都仲有終審庭。按照《基本法》規定，到其時如果終審庭覺得確實解決唔嚟啦，先至去北京釋法都未遲呀。現 今只不過輸咗第一堂即走去釋法，你估阿爺實要聽你支笛判班外傭輸乎？於此可見，呢個階段就釋法，係對阿爺嘅極大不敬，當正阿爺實要聽你老點咁嘅樣，你係阿 爺個契女呀？執正嚟做，阿爺釋你輸咁又點呢？ 獅子委身相許沙膽彤 獅子錢莊宣告改廣告口號，棄「環球金融，地方智慧」（The World's Local Bank）唔用，換上「Part of The New World」。金融海嘯再興，新世界會是如何景象，冇人可知，獅子錢莊更加唔知；若然唔知，咁做乜要成為呢個新世界嘅一部分先？但一旦委身相許，咁咪即係 自認係沙膽彤間新世界嘅囊中之物？咁老襯嘅嘢都肯制，莫非獅子錢莊裡頭有奸細？唔通真係氣數已盡？ 求劉大俠主持公道 如果大家以為深水埗鼠王芬‧梁美芬同全國政協劉夢熊冇乜嘢，咁閣下就大錯特錯矣。前個禮拜六，佢兩個喺又一城COVA撐枱腳，（如果冇嘢，你話會唔會撐枱 腳啦？）唔淨止撐枱腳，更加係全程咬晒耳仔。雖則係喁喁細語，但可以聽得好清楚鼠王芬鬧緊友報《蘋果》，話俾佢哋欺負。鬧完友報，鼠王芬即提高腔調向劉全 國政協詐嬌：「我哋個個叫你做劉大俠，你真係要幫我主持公道呀！」只差冇捉住劉大俠雙手揈兩揈而已。俾鼠王芬咁詐嬌法，你估劉大俠又坐唔坐得穩呢，又？ 奧巴馬要除牌 香港人冇嘢叻，至叻係看風駛 | ||||||