非常人：樂觀到底
1 :
GS(14)@2013-04-13 17:34:51http://hk.apple.nextmedia.com/su ... t/20130413/18225952
科技打冧一台獨大
「有信心！政府嘅既定政策就係要發新牌嘛，驚咩？」這是今年1月中首次訪問林旭華（林伯）時，他如此回應政府遲遲未發新電視牌，眼神堅定。兩個多月後再約見面，彼時距離立法會「要求政府3月底前增發電視牌照作最後決定」的無約束力修訂動議期限尚餘不足3天，還要遇上復活節假，發牌無望，林伯照舊淡定：「唔使『希望』，係一定會發，只係幾時嘅問題！」言猶在耳，截稿前一刻，4月都快過一半，政府依舊無聲氣。
縱然民心所向，最好新電視台立刻啟播，但政府審理牌照申請至今竟可拖拉三年半，再沒疑心的人都會覺得，背後只是等阿爺首肯，林伯指，如以施政角度去想，根本說不通。「從來未試過有一項政策，咁一面倒有八成人支持，而政府居然唔做，如果梁振英真係想令民望加分，就應該順手推舟。」
弊就弊在，口口聲聲說「有為」的特首，連面對碼頭工潮都要龜縮十日才蒲頭，就知他視民望如浮雲，還是作最壞打算──若政府最終不發牌，會否觸發民怨？林旭華繼續樂觀，「社會唔會有太大衝擊！就算唔發牌，都可以保證將來有好多唔同嘅形式去提供影像內容，o依家有邊個無喺電腦上面睇嘢？」也對，現時很多人都已經不開電視機，開個電腦、手機，乜都有得睇。是故林伯直言，王維基其實唔使驚：「就算將來政府發咗牌，佢都係用光纖傳送，唔使好似無綫、亞視咁用大氣電波傳送節目。佢咁堅持要申請免費電視牌照，應該牽涉到廣告來源，可能廣告商仲係好保守。」
觀眾決定電視命運
假若林伯的估計屬實，沒有廣告就不成大水喉，搞不成節目，就算有新播放技術和渠道，都是白做。過去二十年，整個亞洲地區的電視製作已經超越香港，包括偉大的祖國，還未計台日韓綜藝和音樂節目五花百門，香港電視製作還有甚麼叫座力？「你睇吓中國大陸，開放得幾好？以前都係管制得好犀利，o依家又衛視又收費電視，係好多嘢會發生，根本阻唔到。如果我覺得o依家無綫、亞視、有線同now嘅節目唔好睇，咪上網睇囉。」
林旭華說，每個公共政策的制訂必定掀起各方既得利益者的角力，但不能因為個別持牌人的理由去遷就對方，所以無綫、亞視反對加入競爭，可以理解，但兩家公司阻撓發牌的辯解，譬如有電視台會因此而執笠，都站不住腳，政府大可照發新牌，「當年（1998年）電訊業要開放，大東電報局同香港電話公司係有國際電訊專營權，咁咪結束專營權囉、賠償佢囉，我覺得一個有為嘅政府應該咁樣睇事。」
林旭華相信群眾力量，所以去年底，他與林超榮和張同祖等，組成「開放天空！撐！」民間運動，要求政府、無綫和亞視支持開放電視市場。「觀眾真係對唔同嘅電視節目內容有渴求，同埋觀眾先係擁有主宰電視台命運嘅最終決定權。」
遊勻五台山
市民記得林旭華，主要是聽他和鄭經翰主持《風波裏的茶杯》。面對大班，林伯總是擔任下把位，但若論資排輩，大班遠遠及不上林伯。六十年代，九龍塘區是香港傳媒的重要發源地，那時開始，林旭華就與這裏結下不解緣。
1968年入讀浸會書院（1972年改名浸會學院），1973年未畢業前，已加入《英文虎報》擔任全職記者，離開學院，證書也不要。其後加入香港電台電視部，為《獅子山下》當資料搜集，成為他正式踏足廣播道的第一步，1974年，已播放數年的《歡樂今宵》漸露疲態，收視插水，林旭華過檔EYT幫手，破天荒將綜藝節目和生活結合，確立本地電視製作中資料搜集的專職。其後佳視於1975年啟播，掀起香港電視史上最創意勃發的時期，於無綫短短三年，林旭華由普通的資料搜集，變成無綫公關組執行經理，卻埋下轉職佳視的伏線。「當時喺好多人眼中我只係一個o靚仔，由資料搜集變成一個部門嘅主管，水鬼升城隍，發生咗余綺霞在日本懷疑遭非禮，及石崗機場直播時燈台倒塌兩件事，我提咗我嘅意見，但唔得到尊重。」
1978年，林秀峯高薪羅致周梁淑怡加盟佳視，林旭華亦跟隨，減薪過檔，豈料決定錯誤，「入去大概兩個星期，當時《南華早報》嘅《TV Times》總編輯Thomas Earl打畀我，問我可唔可以取消過檔去佳視，我話唔得，應承咗人，佢係第一個話我知，佳視嘅牌照有問題。」原來按牌照規定，佳視股東佔有股權不得超過百分之十五，惟當時林炳炎家族注資違反股權比例，加上林家屬紅色資本，港英政府當然非常關注，「其實初初入到去已覺得有問題，當時會計部喺隔籬，成日都聽到有電話打嚟追數。」同年9月，佳視倒閉，這算是港英政府間接打壓媒體嗎？「我諗每個政府都係想擁有一個能夠操控，或者影響輿論嘅平台，共產黨固然係咁，就算港英政府，一定有佢嘅意圖。」
晃眼四十餘年，職場上波折起伏不少，佳視倒閉、商台封咪、DBC遭陰乾，總是宿命般遇上不同形式的打壓，樂觀的林伯卻從不以陰謀論去看自身遭遇。譬如DBC停播風波，「我跟大班分析，逆境嘅時候要殺出新血路，人哋要封你咪，唔好再鬧政府，初初話半價賣股權都冇人理，o依家百分之一百同你收番晒啲股份，幾好呀。」
「每次遇到逆境或者打壓，倒轉頭我都覺得，係要思考下一個新開始。」現時大班將D100當作正統廣播頻道營運，在數碼港租了兩萬呎辦公室，正如林伯說，看似困局，其實是一個新機遇；造就他如此豁達的人生觀，與他的家庭背景有關。生於汕頭，林家在祖父那代屬小資產階級，後來遭共產黨迫害，祖父的資產遭侵吞，五十年代初隨父親來港，在西環經營皮蛋生意，後來老父入元朗開農場，生活清苦而平淡，到兒女漸大，投身社會，一家七口生活無憂，令林旭華有所感悟。「可能就係睇到老竇從冇到有，相信努力可以改善生活，那些時候，肯做都可得到合理回報，自然就變得樂觀！」對，那是充滿機遇的七十年代，現在是處處受壓的千禧年代呀，「天無絕人之路，唔好害怕轉變。」