📖 ZKIZ Archives

樂觀才有前途 左丁山

http://hk.apple.nextmedia.com/template/apple_sub/art_main.php?&iss_id=20111004&sec_id=12187389&art_id=15670628&cat_id=255&coln_id=22

基金Ａ今日位居要職，但佢想當年，亦是窮學生一名，全憑自己夠勤力，捱上嚟嘅，所以佢對一啲八十後，九十後呻 冇機會上進，不以為然，佢認為只識呻，不識做之人，必然冇前途。有云昔日機會多，基金Ａ之獅子山下故事，已成神話，講吓都俾人笑喎。但林奮強就堅持話唔 係，今天三十歲以下年青人比上一代嘅年青人（林奮強一代，今年五十歲）有更多機會，只要香港能握緊未來五年嘅話。林奮強除咗寫報告，發表文章見記者之外， 更與佢嘅八位八十後研究助理落區宣揚「香港黃金五十」嘅理念，分別在九月廿六日至十月二十日，於柴灣、元朗、荃灣、灣仔開咗五場交流會，面對年青人及街坊 群眾，討論佢地嘅報告。喺十月四日仲會移師沙田佛教覺光法師中學，十月六日於天后庇理羅士女子中學，十月七日灣仔溫莎公爵社會服務大廈，繼續辦街坊交流 會。林奮強話頭幾場有過千人參加，反應良好，討論熱烈，希望在餘下三場，有更熱鬧嘅討論。有意參加者，可打電話到 25280026查詢、登記，或自行上網http://www.hkgolden50.org報名。

點解話現時年輕人嘅機會更多呢？無他者，中國開放市場吖嘛，基金Ａ出道之時，香港 金融服務限於一地，五千萬美元已是天文數字，今天香港服務十三億人市場，任何一個有體面嘅私募、股票基金都有十億八億美元，規模之大，三十年前無法想像。 翻查數字，一九七二年九月底香港嘅銀行存款總額共二百三十一億四千萬元，一九七二年頭十個月有五十五隻新股上市，集資總額共十一億五千萬元，一天成交總額 新紀錄為六億五千九百三十四萬元，現在睇番轉頭，呢啲數字真係濕碎到極。有前途之人一定係樂觀之人，如果成日掛住反增長，反興建新事物，唔剩止自己冇前 途，下一代人更加生活艱難。悲觀派與停滯派從來都被時代淘汰，三十歲未夠就埋怨將來冇機會，不如阿爸嗰代，好難得人同情。

PermaLink: https://articles.zkiz.com/?id=28231
Next Page
ZKIZ Archives @ 2019